euskalkultura.eus

Banatu berriak dira AEBetan Emmy-ak, bertako telebista arloko sariak, eta taulagainean entzun ziren eskertza hitzaldien artean "Eskerrik asko danori!" ozen bat ere entzun zen. Aspaldi AEBetan bizi den Ricardo Arambarri kazetari euskal-venezuelarrak bota zuen, Univision telebistako "Desamparados desechables" erreportaiagatik saria jaso zuenean. Arambarri gernikarren semea da eta euskalduna. "Hitzaldia nire ama hizkuntzan amaitu behar nuen", esan dio Arambarrik EuskalKultura.com-i. 

Bego Miñaur/Donostia-San Sebastian. Ricardo Arambarri kazetari euskal venezuelarrak Emmy saria jaso du aurten, "Desamparados desechables" erreportajearengatik. Emmy sariek AEBetako telebista munduko profesional onenak aintzat hartzen dituzte, eta telebista kazetaritza arloan jaso daitekeen saririk nagusiena dira. 

"Hauek ez dira entretenimentu arloko sariak, baizik eta kazetaritzakoak; galak ez zuen hainbeste ikusle izango. Baina AEBetan lan egiten duen kazetari batentzat lortu daitekeen saririk nagusiena dira", esan dio kazetariak EuskalKultura.com-i. "Talde bikainen aurka lehiatzen nintzen, eta ezin nuen imajinatu saria jasoko nuenik. Hala ere, badaezpada, hitz batzuk prestatuta neuzkan"

Gero, gertatu ohi denez, hitz horiek guztiak ahaztu egin zitzaizkion taulagainera igo zenean. Azkenean, "sentitzen nuena esan nuen. Eta nire ama-hizkuntzan amaitu nahi izan nuen, denei euskaraz eskerrak emanez". Sustatu albistegiak sarean jarri du Arambarriren eskertzea. Frantsesez eskertu zion emazteari 33 urtetan zehar emandako sostengua; gaztelaniaz lankideei, eta euskaraz amaitu zuen hitzaldia, "eskerrik asko danori!" ozen batekin.

Arambarri euskal-venezuelarra da, baina aspaldi bizi da Estatu Batuetan eta Miamin egiten du lan, Univision katean. Bere gurasoak gernikarrak dira, eta berak euskaraz egiten du, bizkaiera garbi-garbia. "Txikitan, Gernikan, euskaraz hitz egitea debekatuta zegoen eta etxean bakarrik egiten nuen", esan digu kazetariak. "Euskara txikitan ikasi nuen hizkuntza da, gaur egun Miamin apenas erabiltzen dudana, bakarrik Gernikara gurasoak bisitatzera noanean. Aurten bi aldiz izan naiz dagoeneko. Nire gurasoek 86 urte bete dituzte". 

Saria jaso zuen gauean bere anaia Patxi Gernikan zen, gurasoei bisita egiten. "Avelina Aurrekoetxeak eta Francisco Arambarrik saria jaso nuen uneko bideoa ikusi zutenean, ilusio gehien egin ziena eskerrak euskaraz ematea izan zen. Amak ez zuen ezta galdetu ere egin saria zer erreportajeagatik jaso nuen! Nolabait gurasoak harro sentiarazi nituela uste dut", agertu du Arambarrik. 

"Lankide askok idatzi didate zer esan nuen galdetuz. Eta, pazientzia handiz azaldu diet batzuei zer esan nuen. Besteek, ondo ezagutzen nautenek, bazekiten zeozer euskarazko zeozer izan behar zuela. Nortasun eta etnizitate horrekin identifikatu bainaiz nire bizitza osoan. Eta gertukoenek bazekiten zehatz-mehatz zer esan nahi zuen".

"Egia esan, ez da beste munduko ezer. Eskerrak ematea euskaraz, besterik ez. Baina, niretzako, leku egokia eta une egokia zen: nire lanbideko saririk gorena jasotzen ari nintzela, nire sustraietaz harro nagoela erakustea", amaitu du.

Ricardo Arambarri kazetariari elkarrizketa egin zion "Hiri gorrian" Euskadi Irratiko saioak. Entzun Arambarri bizkaiera jator-jatorrean berbetan, hemen!