euskalkultura.eus

Donostia-San Sebastian. Iritsi da azkenean. Haurdunaldi luzea eta gero, eta denborak eta bitartekoek utzi digutenean, gauzatu ahal izan dugu azken pare bat urteotan behin eta berriro aipatutako zorioneko aldaketa eta urrats berria. Oraindik, izango denaren zati bat baino ez dago ikusgai, eta datozen aste eta hilabeteotan joango gara emeki atal eta zerbitzu berriak aurkezten.

Gaurkoan ikusiko duzuna, orain arteko atalak eta beste atal berri batzuk dira: albisteak bat eta bi, euskal kultura eta diaspora berriekin; Diasporaren agenda, mundu osoan Diasporarekin harremanduta gertatzen diren deiak bilduz; argazki galeria, gure Diaspora iruditan erakutsiz; Zorion agurren tartea, gure komunitateetako lagunei zorionak emateko sortua, izan euren urtebetetze edo urteurren baten karietara, edo azterketa bat gainditu dutelako, lan berria lortu dutelako, ezteiak direlako, lehenengo jaunartzea dutelako, lan handia egiten dutelako edo, besterik gabe, lagun onak direlarik merezi dutelako (agurrak, norberak idatz ditzake bere lagun edo inguruko bati buruz eta argazki bat gehituz hemendik bidal ditzake) ; Oroimenean sailera, heriotzak eta despedidak batu ditugu; Bideo atalera, guk geuk euskal etxeetan edo diasporan ateratako bideoak edo beste batzuek egindakoen artetik hautatutakoak; Nor garak, EuskalKultura.com proiektuaren aurkezpen orokorra egiten du; eta, oraingoz azkenik, Nire Talaiatik sailak Diasporaren esparruari buruz Joseba Etxarri gure zuzendariak idatzitako egungotasun iruzkinak bilduko ditu.

Datozen hilabeteetan atal berriak zabaltzen joango gara, eta emango dugu aldi bakoitzean dagokion hobekuntzaren berri. Horrekin batera, pazientzia eta eskainitako konfidantza eskertzea geratzen zaigu. Gaurko Zorion Agurren tartean EuskalKultura.com eta Diasporaren familia ager zitezkeen, bozkario eguna baitugu fase berria hasi eta buletin berria erditzearekin. Hau da, beraz, EuskalKultura.com-eko gaurko lehenengo albistea. Gainerakoekin batera, on egin, irakurle.

Lotura interesgarriak

Zer da EuskalKultura.com
http://www.euskalkultura.com/nor-gara