Comodoro Rivadavia. Comodoro Rivadaviako Euskal Etxearen Mendeurrena ospatzeko egiren ari diren ekitaldien baitan, datorren larunbat honetan, ekainak 10, "Euskal Etxea Elkartea" berdegunea inauguratuko dute 11:00etan El Chubut eta Esquel kaleen arteko tartean. Ekitaldian Gorka Alvarez Aranburu Eusko Jaulritzako Kanpoko Euskal Komunitatearentzako zuzendariak parte hartuko du eta alderdi artistikoan, Euskal Etxeko 'Lagun Artean' abesbatzak eta 'Haize Dantzariak' dantza taldeak arituko dira.
Berdegunea euskal izenez bataiatzeko zeremonian leku garrantzitsua izango du landaketa batek, Gernikako Arbolaren kimu bat landatuko baita euskal emigranteen eta ondotik etorritako Comodoroko euskal jatorriko herritarren ekarpenari gorazarre. Gogora dezagun Euskal Herriaren, eta munduko euskaldunak batzen dituen, sinboloa dela Gernikako Arbola, Euskal Populuaren iraun nahiaren eta aurrerabidearena, mendez mende iraun duen transmisio eta etorkizun bokazioaren ikurra.
Larunbat honetarako gonbidapen-deia, Euskal Echea Elkartearen Mendeurrenaren barne
Patagoniako euskal etxeetako dekanoa da Comodorokoa, baita egoitza duen munduko euskal egoitza australena. Bertatik adierazi dutenez, "Comodoro gure hirian lehorreratu ziren eta hemengo gizartearentzat eta kulturarentzat funtsezkoak izan diren euskal etorkinak omentzen ditu berdegune honek. Gure Mendeurrenaren barruan, gune hau gure elkarteari egindako eta, oro har, gure hiriaren mesedetan, lan nekaezina egin duten euskal familia guztien aldeko omenaldi eta aitorpen zuzena dela uste dugu", adierazi dute.
Lagun bati bidali
Komentarioa gehitu
