Euskal Liburutegiak Xabier Olasoren 'Pupuan trapua' eta Lauaxetaren 'Bide Barrijak' poema liburuak argitaratu ditu

Erdal irakurleei euskal literatura ezagutzeko bidea emateko ekimenean Euskal Liburutegia-Biblioteca Vasca Bilingüe bildumak bi izenburu berri argitaratu ditu. Euskal poesiaren emaitzak dira biak, baina denboran urrun daude bata bestearengandik. Bata 1931an Lauaxetak argitaratu zuen 'Bide Barrijak' lana da. Bestea Xabier Olaso arabarraren 'Pupuan Trapua', haurrei zuzenduriko poema liburua (2005eko Euskadi Literatur sariaren garailea).

Madrileko Atenea argitaletxearen Euskal Lliburutegia-Biblioteca Vasca Bilingüe bildumak bi liburu berri argitaratu ditu: Xabier Olaso arabarraren 'Pupuan trapua' (Un trapito en la pupa hartu du gaztelerazko izenburua) eta Estepan Urkiaga, Lauaxetaren 'Bide barrijak' (Nuevos rumbos izenburuduna gaztelaniaz). Hauekin Jon Kortazar kritiko eta EHUko literatur katedradunak koordinatzen duen Biblioteca Vasca bildumak 15 izenburu biltzen ditu dagoeneko Madrileko Atenea argitaletxearen baitan.

Xabier Olasoren 'Pupuan trapua' haurrei zuzenduriko poema liburua da eta 2005ean Euskadiko Literatur Saria irabazi zuen. Liburuak bi zati dauzka: lehenengoak 61 poema biltzen ditu eta soinu eta onomatopeiaz jositako lanen bitartez haurrei poesiarekin dibertitzeko proposamena egiten die. Bigarren zatian, ordea, hogei bat poemek lo egiteko ordua, ametsak eta seaska kanten mundua dute ardatz.

Egilea bera izan da gaztelerazko itzulpena egin duena. Olasok liburuen aurkezpenean aitortu zuenez, lan nekeza izan da, jatorrizko bertsioan fonetikak eta errimak eta haurren interesa pizteko erabili zituen beste baliabide batzuek garrantzi handia zutelako.

Bigarren lana 1931an argitaratu zen Lauaxetaren 'Bide Barrijak' poesia liburuaren edizio faksimile bat da. Liburuak Nuevos Rumbos izenburua du gazteleraz eta orijinalaren letra tipologia, hitzaurrea eta eskaintza bera ditu besteak beste. 'Bide Barrijak' Lauaxetaren lehen poesia liburua izan zen eta 'poetaren akatsak argi erakusten' baditu ere, euskal poesiagintza garaiko europar literatur korronteetara ekartzeko ahalegin aintzindaria izan zen.

Lotura interesgarriak

Biblioteca Vasca Bilingüe- Euskal Liburutegia
www.euskal-liburutegia.net

'Kafka Bilbon' eta 'Eta handik gutxira gaur', gazteleraz
EuskalKultura.com-en argitaratua 2006ko abenduaren 7an

euskalkultura.eus

Albisteak

Euskal Liburutegiak Xabier Olasoren 'Pupuan trapua' eta Lauaxetaren 'Bide Barrijak' poema liburuak argitaratu ditu

Komentarioak

Irakurrienak

Azken komentarioak