euskalkultura.eus

Viedma, Argentina. Hezkuntza komunitatearen oniritziarekin garatu da euskal kulturari eskainitako "Hizkuntzen eta Kulturaren Bigarren Jardunaldia" Rio Negroko Unibertsitate Nazionaleko Nazioarteko Harremanetarako Saila antolatzaile, Viedma, Carmen de Patagones eta bertako eragin eremuko Aberri Etxea Euskal Etxearekin elkarlanean. Ekimenak ikasleak eta unibertsitateko langileak kultur esperientzia berrietara hurbiltzea sustatu nahi du.  Atlantikoko egoitzako kanpusean izan da, maiatzaren 29an, asteazkena, eta 30ean, osteguna, eta bileretan, teorikoki eta praktikoki, Euskal Herriko kulturaren hainbat alderdi jorratu dira.

Jardunaldiaren hasiera UNRNko idazkari nagusi Luis Vivasek eta Atlantikoko Egoitzaren errektoreorde Daniel Barriosek hartu zuten berba, UNRNko Nazioarteko Harremanetarako zuzendari Paula Awerekin batera. Aberri Etxeko Kultura Arloko erreferente Ruben Suarezek Euskal Moduluaren sarrera garatu zuen eta  euskaltasunaren esanahia kulturaren ikuspegitik jorratu zuen. Rocio Basterra del Vall Iturria eta Virginia Argañaraz Aberri Etxeko euskara irakasleek oinarrizko edukiak eta eguneroko elkarrizketa errazak landu zituzten. Bere aldetik, Josetxu Astolfik euskal dantzen eta euren historiaren alderdi orokorrak azaldu zituen. Lehenengo egunean, partaideek dantzan bukatu zuten Atlantikoko Egoitza Nagusiko sarreran egindako errondan.

Bigarren eguna

Bigarren jardunaldia, ostegunean, maiatzaren 30ean, euskal sukaldaritza eta zinemari eskaini zitzaion. Sandro Linares Goyenolak euskal sukaldaritzaren oinarriei buruzko azalpen teorikoa eman zuen eta, amaitzeko, dastatu zituzten pintxoen eta euskal pastelaren elaborazioa azaldu zuen. Euskal zinemaren zatia Mertxe Barcosek zuzendu zuen.  Alex de La Iglesiaren Mirindas Asesinas film laburrarekin lan egin zuen, baita ere Maximiliano Gonzálezek zuzendutako eta 2012an Argentinako Zinema eta Ikus-entzunezko Arteen Institutu Nazionalak (INCAA) ekoitzitako El vasco de la carretilla dokumentalaren pasarteekin, eta 2016an EiTBk ekoitzitako “Orain 80 urte” dokumentalaren zatiekin. Eztabaida eta gogoeta truke aberats batekin amaitu zen jarduera.