euskalkultura.eus

Tokio, Japonia. Euskal kultura eta euskarenganako zaletasuna, duela urte asko piztu zitzaion Hagio Sho japoniarrari, hain zuzen ere Waseda Unibertsitatean euskal ikasketak egin zituenean, Suzuko Tamura euskaltzain urgazlearen zuzendaritzapean. Bertan ezagutu zuen Hiromi Yoshida eta berarekin idatzi du Gendai Basuku wo Shiru tame no 50 Shou (Gaur egungo euskal gizarte eta kultura ezagutzeko eta ulertzeko 50 atal) liburua. Tokioko Akashi Shoten Ltd. argitaletxeak plazaratu du lana iragan maiatzean.

Liburu honekin egileek euskal kulturaren ikuspuntu zabalago bat eskaintzea dute helburu, eta, horrekin batera, japoniarrek gaur egun izan ditzaketen zenbait informazio erratu eta topikoak argitu nahi dituzte. Sho-k EuskalKultura.com-i azaldu dionez, Japonian Euskal Herriari buruz agertzen diren argitalpen gehienak Euskal Autonomi Erkidegoa baino ez dute kontutan hartzen, eta lan honek bere osotasunean hartzen du Euskal Herria, Iparralde eta Nafarroa ere aipatuz.

Sho-ren esanetan lan honek euskal testuingurua gainditu nahi du, ikuspuntu zabalago eta unibertsalago baten bila. Horren harira, japoniarrek zenbait euskal kontzeptu oso ondo ulertuko dituztela dio. Adibidez, Oteiza eta Chillidaren lanetan gakoa den hutsaren kontzeptua, oso ondo lotzen omen da Taoismoan eta Zen pentsamenduaren ideiekin, eta beste horrenbeste gertatzen omen da, esaterako, Josean Artzek txalapartaren soinua isiltasunaren oihartzuna dela dioenean.

Herri kirolak Koben eta Nagoyan

Hagio Sho-k Tokioko Euskal Etxea abuztuan partaide izango dituen bi ekitaldi ere aurreratu dizkie EuskalKultura.com-eko irakurleei, adieraziz, batetik, abuztuaren 6tik 9ra Koben  Globalizazio eta Herri Kirolei buruzko 2. Nazioarteko Mintegia egingo dela. Kobeko Atzerriko Ikasketen Udal Unibertsiteak eta Euskal Herriko Unibertsitateak antolatu dute, Tokioko Euskal Etxearen laguntzarekin; besteak beste, euskal kirol eta joko tradizionalek aztergai hartuko dira bertan.

Bestetik, eta aurrekoari loturik, abuztuaren 11n Tokioko Euskal Etxeak euskal herri kirolei buruzko hitzaldi sorta antolatu du Nagoyan. Euskal Herriko Unibertsitateko zazpi adituk parte hartuko dute bertan.