euskalkultura.eus

Bilbao, Bizkaia. Euskal Herrian bizi diren euskal-venezuelarrek Urteroko Topaketaren data aldatzea erabaki dute aurten: apirilaren 19aren osteko lehen larunbatean egin ordez (apirilaren 20ean, beraz), oraingoan apirilaren 27ra atzeratzea erabaki dute. Arrazoia zera da; hilaren 14an Venezuelako hauteskundeetarako botoa emateko komunitate honetako kide asko Bilboko kontsulatura inguratu behar izango dutela. Hortaz, bazkaria bi asteko tarte bat utziz egitea egokiena izango zela pentsatu dute antolatzaileek, Gipuzkoa, Nafarroa eta Euskal Herriko leku urrunxeagotako jendea aiseago azalduko delakoan.

Aldatuko ez dena, ordea, bilkuraren herria izango da: Galdakao, urtero bezala. Amaya Zenarutzabeitia antolatzaileak azaldu duenez, egitaraua betikoaren antzekoa izango da: meza urtean zehar zendu diren taldeko kideen oroimenez, eta bazkaria. 

Erreserbak

Bertara joango direnen kopuru zehatza baieztatu zain dira antolatzaileak, horrela bazkariaren menua eta prezioa adostu ahal izateko. Diotenez, Aretxondo jatetxera itzuliko da aurten, eta menua 35 euro ingurukoa izango omen da.

Hala ere, ezinbestekoa da lehenbailehen jakitea zenbat lagun izango diren bazkaltzeko. Horretarako, bazkarian parte hartu nahi duenak Amaya Zenarutzabeitiarekin harremanetan jarri behar du, honako telefono hauetara deituz: 944567027 (etxea) edo 653015813 (mugikorra eta WhatsApp).