euskalkultura.eus

Donostia-San Sebastián. Dena prest dago Donostian eta Azpeitian gaur gauerdian jai handiari hasiera emateko. Datozen orduetan bi herri hauetako kaleak danborra jotzen arituko diren milaka lagunez beteko dira. Donostian, kasu, 12.000 nagusi eta 4.700 haur aterako dira konpainia desberdinetan.

Aurreko urteetan bezala, bertan jaia bizi ezin dutenek zuzenean telebista bidez ikusi ahal izango dute, ETB, ETB-Sat eta Canal Vasco-ren bidez. Hala ere, Diasporako hainbat euskal etxetan haratago joango dira eta euren jai eta, kasu batzuetan, danborrada propioak egingo dituzte. Adibidez Necochean (Argentina) eta Mexiko DFn danborrada ia-ia profesionalak direla esan daiteke, Donostian eta Azpeitian ateratzen direnen parekoak jende, gogo eta abilezian.

Madril, Bartzelona, Murtzia

Madrileko Euskal Etxean afaria egingo dute gaur bertan Salones Orfeo jatetxean (C/ Atocha, 125) eta gauerdian nagusien danborrada joko dute, ETBko emanaldiari jarraiki. Bihar haurren txanda izango da eta urtero bezala Euskal Etxearen egoitzaren aurrean egingo dute danborrada.

Bartzelonako Euskal Etxeak ere gaur ospatuko du jaia, egoitzan egingo duten afari batekin. Bertaratzen direnen artean sukaldari txanoak eta makilak banatuko dituzte eta gauerdian danborrada joko dute. Murtzian ere afaria egin eta danborrada 'kit'-a banatuko dute, laugarren urtez.

Seatle, New York, Caracas, Mexiko

Estatu Batuetara ere helduko da danborrada eta New Yorken, adibidez, Donostiako Gaztelubide elkartekoek oparitutako danborrekin jo ahal izango dute. Seattle-en aldiz, danborradaren 'errudunak' Joseba Jimenez donostiarra, Txori jatetxeko jabea, eta Caroline emaztea dira. Iaz lehenengo aldiz San Sebastian eguneko jaia antolatu zuten eta izan zuten arrakastak animatuta, aurten ere 17:00etatik aurrera, jatetxea Seattle-eko danborrada zale guztien bilgunea izango da.

Renon, berriz, aukera berezia izango dute gaur danborrada ospatzeko. Donostiarekin senidetua den hiri honetako jende talde bat Javier Etxeberria eta bere familiaren etxean --donostiarrak eurak-- bilduko dira, festari behar bezalako ohoreak egiteko. Ikasurte baterako Estatu Batuetan den familia honek ez du San Sebastian eguna pasatzen utzi nahi izan eta danborrada jotzeko deialdia egin die Nevada-Renoko Unibertsitateko Center for Basque Studies-eko lagun eta lankideei. Ordu-aldeari muzin eginez, arratsaldeko hiruretan bilduko dira, ETBko zuzeneko erretransmisioa internet bidez segitzeko, gaur Estatu Batuetan jai eguna dela baliatuz.

Beste danborrada bat, kasu honetan klasikoa, Mexiko DFko euskal etxearena izango da: urtero berrehun lagundik gora biltzen dira bertan afaltzeko eta elkarteko kideek osatutako danborrada ikusi eta entzuteko. Azkenik, Caracas-en (Venezuela) bertako euskal etxeak larunbateraino atzeratuko du jaia ahalik eta kide gehienek izan dezaten nagusien eta txikien danborradaz gozatzeko aukera.