euskalkultura.eus

Corpus Christi, Argentina. Herriaren 134. urtemuga dela eta Turismoa, Kultur Arteko Hezkuntza eta Jesuiten Misioak garatzeko I. Kongresua egin zen irailaren 26 eta 27an Corpus Christi-n. Kongresuko bilerak Udaleko Areto Nagusian burutu ziren eta Argentinako zein Paraguai eta Brasilgo mintzalariek ere euren txostenak azaldu zituzten publikoaren aurrean. “Gure asmoa euskal etxean sortutako eta etorkizunari begirako proiektuak kongresuan aurkeztea izan da”, azaldu diote EuskalKultura.com-i Eusko Etxea elkarteko arduradunek. “Horretaz gain Jesuiten Misioetako bideari buruzko interes amankomunak ditugun Paraguaiko lagunekin jarri gara kontaktuan, eta hori oso ona da guretzat”, azpimarratu dute Corpus Christiko lagunek.

[Eskuinetik ezkerrera, erakundeko lehendakariorde Ana Maria Macchi Echagüe, Olga Leiciaga lehendakaria, Gladys Ferragut diruzainordea, Rocio Miranda liburuzaina eta Carmen Miranda diruzainak osatutako taldeak ordezkatu zuen euskal etxea kongresuan]

Urtebetetzeko ospakizunen artean, eta Kongresuko bigarren jardunaldia hasi aurretik, irailaren 27an zeremonia berezi bat egin zen herriko San Martin Plazan. Corpus Christiko Eusko Etxea-ko kideei esker ikurriña Argentinako banderaren ondoan altxatu zen ekimen honetan, komunitatearekiko euskal gizataldearen engaiamenduaren isla.