euskalkultura.eus

euskal diaspora eta kultura

Albisteak rss

Euskal gastronomiak topaleku berria du Londresen ekainaz geroztik: Donostia jatetxea

2012/06/26

Porru eta arrautza pintxo bat prestatzen Donostia jatetxean (argazkia Donostia)
Porru eta arrautza pintxo bat prestatzen Donostia jatetxean (argazkia Donostia)

PUBLIZITATEA

Joko Olinpikoen bezperan instalazio eta azpiegitura berriak ari dira inauguratzen Londresen etengabe eta hiriak giro berezia du egunotan. Irekiera horien guztien artean, hilaren hasieran euskal komunitateak adi-adi jarraitu zuen bat ere gertatu zen: Donostia jatetxearena. Ardo inportazioaren bitartez euskal gastronomiaz maitemindu zen bikote batek zuzentzen du jantokia eta Euskal Herriaren zati bat ekarri du Ingalaterrako hiriburura. Jatetxeko sukaldari burua Donostiako A Fuego Negro eta Urepel jatetxeetan trebatu da, eta arrakasta gehien izaten ari den platera ez zenukete asmatuko: bakailaoa pil-pil erara!

Londres, Ingalaterra. Melody Adams eta Nemanja Borjanovic ez dira euskaldunak, baina euskal gastronomiaren enbaxadore bihurtu dira Londresen. Melody ingelesa da eta Nemanja serbiarra, eta hainbat hilabeteko lanaren ondoren Donostia jatetxea ireki dute hirian, zehatzago Marylebone auzoko Seymour Place-kaleko 10. zenbakian.

Duela hiru urte hasi zen dena: bikoteak Arabako Guardia herriko upategi batzuetara bidaia egin zuen (inportazio enpresa bat dute, www.mountainvalleywines.co.uk) eta bidean liluratuta gelditu ziren euskal gastronomiarekin. "Hamazortzi orduz etengabe gidatu ondoren, Donostian gelditzea erabaki genuen, Melodyk bertako jatetxeei buruzko artikuluren bat irakurria zuelako", azaldu dio Nemanjak EuskalKultura.com-i. "Txunditu egin gintuen gastronomiak eta kulturak zeukaten harreman estuak, kalitate mailak eta zaporeak", aitortzen du.

Izenak erakarri

Hurrengo hilabeteetan bikotea beste bederatzi aldiz bueltatu zen Euskal Herrira eta lagunak eta kontaktuak egin zituzten sukaldaritza munduan. Azkenik, hasieran txantxetan esaten zutena gauzatzea erabaki zuten: gastronomia kontzeptu hau, sukaldaritza sinplea baina kalitatezko osagaiekin eta mimoz eta arduraz egina, Londresa ekartzea.

Ideiak forma hartu du Donostia jatetxean eta jabeen esanetan izenak "gustukoa duguna eta izan nahi duguna" laburbiltzen du. Horrez gain izen erakargarria dela aitortzen dute: "askok ez dakite zer esan nahi duen, baina dakitenak jakinminak erreta etortzen dira geurera".

Londres Donostia Jatetxea

[Sukalde irekiari esker jantokiko bezeroek platerak nola prestatzen diren ikus dezakete (argazkia Donostia)]

Bakailaoa errege

Sukaldaria aukeratzea izan da proiektuko lanik zailenetako bat eta jabeek Tomasz Baranski aukeratu dute. Baranski Londresko Barrafina jatetxean aritu da eta Donostia ireki aurretik sei asteko ikastaro trinkoa egin zuen Donostiako Urepel eta A Fuego Negro jatetxeetan, teknika berriak ikasteko.

Arduradunen esanetan, Donostiako plateren artean arrakasta handia du Bakailaoak Pil-pil erara eta pintxoek, bereziki Olagarroa Euskal Marinadarekin, Otarrainxka Tenpura urdaiazpikoarekin edo kroketak bezalako jaki sinple baina tentagarriek.

Euskal produktuak

Jatetxearen sekretuetako bat Euskal Herritik ekarritako lehen mailako produktuak erabiltzea da: besteak beste, Idiazabal gazta, Getariako Agerre txakolina,  Bereziartua sagardoa eta nola ez, Arabako Landaluze upategietako ardoak, izan ere lehenengo bisita hartan horiexek probatzera joan baitziren Melody eta Nemanja Euskal Herrira.

Jatetxea astelehenetan eta astearte eguerditan ixten dute. "Oraindik sukaldari talde txikia dugu eta chef gehiago behar ditugu", gehitzen du Nemanjak.

-Informazio gehiago, jatetxearen webgunean: www.donostia.co.uk



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.com

jaurlaritza gipuzkoa bizkaia