euskalkultura.eus

Buenos Aires, Argentina. “2010eko Udako Euskal Unibertsitatearen programa aurkeztu genuenean, euren seme-alabek --eskolako ikasleek-- ikasten dituzten gaiez jakin-min handia erakutsi zuten gurasoek”, azaldu dio EuskalKultura.com-i Enrique Aramburuk, Euskal Echea Elkarteak kudeatzen duen proiektuaren arduradunak. “Hori dela eta, haiei zuzendutako ikastaro bat prestatu genuen”.

Ikastaroa ekain honetan, hilaren 5ean hain zuzen, gauzatu da Euskal Echea Institutuko Llavallolgo egoitzan. Irakasleei dagokienez, udako ikastaroetan aritzen diren batzuk izan dira hautatuak eskola hauek emateko: Pedro Beramendik, “Euskal historiaren bi mila urte” atala eman du; Jorge Beramendik, berriz, “Euskaldunen jatorria” eta “ Euskal ohiturak” hartu ditu gaitzat. Carlos Irisarri, azkenik, Euskal Kulturaz mintzatu da, aurkezpen orokor bat eginez.

Eskolen ondoren, lagun arteko bazkarian hartu dute parte ikasle eta irakasleek. Geroari begira, beste ikastaro bat antolatzen ari dira Euskak Echea-ko kideak baina oraingoan, komunitate osoari irekia. Horrez gain, klaseak Sarandi kaleko --Buenos Aires Hiriko-- egoitzan izango dira hiru ostegun jarraietan, arratsaldeko 6etatik 8etara. Ekitaldi honetan, Udako Euskal Unibertsitateko aurtengo edizioko idazlanak libururatuta aurkeztuko dira.

Lotura interesgarriak

Euskal Echea Institutua
www.euskalechea.org.ar