euskalkultura.eus

Sao Paulo, Brasil. Itapeviko Euskal Etxeak egin berria du irailaren 2tik 4ra bere lehendabiziko Euskal Astea, izan ere, Sao Paulo estatuan euskal kulturaren berri emanez eta euskal presentzia ezagutaraziz, hitzaldi, kontzertu eta beste zenbait ekitaldien bitartez. Joan den ostiralean, ekitaldiak abiaraziz, bertan izan zen Ana Luiza Etchaluz euskal-brasildarra, 'Alma Basca' izeneko bere liburua aurkezteko. Lan honetan Etchaluzek bere euskal jatorria ezagutzen eta bere erroen bila bizi izan duen esperientzia azaltzen du.

Brasilen euskal emigrazioa egonik ere, gutxi dira euren jatorriari buruzko informazioa dutenak. Hala aitortu zuen Etchaluzek liburuaren aurkezpenean. Berea, gai honi buruz portugesez idatziriko bakarra omen da momentuz, eta egileak berak azaldu zuenez, Porto Alegreko komunikabideetan eginiko elkarrizketak medio liburuaren berri izan duten lagun asko euskal sustraiak ote dituzten argitzeko jarri dira berarekin harremanetan. Euskal erroei eta euskal jatorriari buruzko interesa piztu du bere inguruan Etchaluz-ek, eta testuinguru horretan Porto Alegre hirian euskal etxe bat sortzeko ekimena sustatzen ari da gaur egun, Itapeviko Euskal Etxeko kideen aholku eta laguntzarekin.

Brasildik Baionara

Gara egunkariko Joxean Agirre kazetariari aurtengo urtarrilean eman zion elkarrizketan honetan Etchaluz liburuaren sorreri buruz mintzatzen da: "Aitaren abizena euskal jatorrikoa zela txikitandik jakin izan dut, baina oso informazio gutxi genuen Euskal Herriaz. Brasil hegoaldean euskal jatorriko jende asko bizi da, Uruguai edo Argentinatik etorriak gehienak. Gure aitaren arreba batek asko hitz egiten zuen gure jatorriaz eta aitak ere maiz irudikatzen zuen nola iritsi ziren Etxaluztarrak Porto Alegrera, baina ez zuen inolako daturik".  Argentinan ba omen zituzten lehengusuak, baina haien bitartez ezin izan zuten ezer gehiago jakin.

Interneten begira, Ana Luizak, Christiane Etxaluz ezker abertzaleko militantearen istorioa aurkitu zuen. Frantsesa ikasten hasi eta hizkuntza nahikoa menperatu zuenean berarekin harremanetan jarri zen 2007an. Baionako etxera deitu zion eta telefonoari helduta mutu gelditu zen Ana, emozioak zorabiatuta. Orduan, deskubritu zuen bere 'kusi' Etxaluzek portugesa mintzo duela, haren senarra, Alfonso Etxegarai, Sao Tomé irlan deportatua bizi delako (bikotearen historia kontatzen du 'Sagarren Denbora' filmak). 

Etxaluzek bidalitako informazioaren laguntzarekin osatu du Ana Luizak bere familiaren zuhaitz genealogikoa, eta Euskal Herria bisitatu eta ezagutzeko aukera izan du. Gero, iaz urte hondarrean plazaratu zuen 'Alma Basca'-n bere esperientzia hori azaltzen du eta, antza, beste zenbait euskal brasildarri lagungarri izaten ari zaio.