euskalkultura.eus

Gral. Villegas, Argentina. Berrehun eta hogeita hamar bat lagun bildu ziren martxoaren 12an Villegas'ko Euskaldunak-eko egoitzan euskal erakundearen lehen hamarkada ospatze aldera. Jaiarekin hasteko, Aitor Alava dantzariak ohorezko aurreskua dantzatu zien lekura bertaratu ziren herriko eta euskal komunitatko agintariei, hau da, Ricardo Basterra FEVAko lehendakariari, Diego E. Tellechea euskal etxeko lehendakariari eta Gilberto Alegre herriko alkateari, hain zuzen.

Musikarekin jarraituz, eta Arrecifesetik urtemugaren jaian aurkeztera propio etorritako Maral Taldeak Euskal Herriko kanta tradizionalak eskaini zituen, giroa berotuz publikoak ere abes zezan.

[Arrecifeseko Maral Taldeko kideek euskarazko errepertorioa abesteaz gain, txalaparta jo zuten]

Urtebetetze guztietan bezala, opariak emateko ordua heldu zen eta Sergio Recarte euskal etxeko kideak, Arturo Campion Euskal Ikasketa Gunearen 'Guregandik' aldizkariaren 6. zenbakia oparitu zion batzordeari. Bide batez, euskal erakundeko kideek, euskal etxeak hilabetero plazaratzen duen 'Beti Aurrera' buletinak orain artean argitaratutako ehun aleak eskuratu zizkieten Gral. Villegasko alkate eta FEVAko lehendakariari.

[Etxeko dantzariek Aitor Alava-rekin batera gaua alaitu zuten euren dantzekin]

“Gernika Plaza Txikiaren inaugurazioa eta euskal etxeko urtemuga egun berean ospatu nahi genuen, baina eguraldiak ez digu lagundu eta atzeratu behar izan dugu Plazaren inaugurazioa”, azaldu diote Villegas'ko Euskaldunak euskal etxeko kideek EuskalKultura.com-i. “Ekitaldia, beraz, apirilaren 26an izango da, Gernikako Bonbardaketaren ospakizunarekin batera. Udaletxeak utzitako onibarrean La Platako Jose Orbaicetak oparitu zigun Gernikako Haritzaren Kimua landatu genuen”, adierazi dute villegastarrek.

“Hamar urte hauetan ekintza ugari garatu ditugu euskal etxean”, jakinarazi dute Villegas'ko Euskaldunak-etik. “Hitzaldiak antolatu ditugu, Euskal Herriko jaiak ospatu, euskara klaseak eman, herriko hainbat eskolatara eraman dugu euskal kultura eta Euskal Astera goaz urtero. Orain bete nahi dugun ametsa egoitza propioarena da eta gero eta hurbilago gaude. Hori dela eta gurekin lan egin zutenei eta gure nortasun euskalduna eraikitzeko lagundu zigutenei esker beroak eman ahi dizkiegu”, azpimarrau du Villegas'ko Euskaldunak Euskal Etxeko kideek.