euskalkultura.eus

Brusela, Belgika. Iñigo Urkullu lehendakariak euskal komunitateari egin zion harrera atzo Bruselako Euskadiren ordezkaritzan eta bertara bildu ziren Europako erakundeetan lanean ari diren hainbat euskal politikari eta teknikari, tartean Izaskun Bilbao eurodiputatu jeltzalea eta Carlos Iturgaiz popularra. Bruselako Euskal Etxearen ordezkaritza bat ere izan zen ekitaldian.

Urkulluk adierazi zien Bruselako euskaldunei "Euskadi Europari begira" dagoela, ezinezkoa baita "XXI. mendeko erronkei aurre egitea Europatik kanpo". Horrez gain, lehendakariak azaldu zuen  Jaurlaritzaren erronka nagusia krisialditik irtetea dela, «kudeaketa zorrotza eginda eta jarduera ekonomikoa suspertzeko neurriak hartuta». Gainera, Urkulluk nabarmendu zuen Euskadik badaukala «etorkizuna bakean eta bizikidetzan eraikitzeko aukera», eta Europako erakundeen babesa izatea espero duela bide horretan.

Topaketa honen aurretik, goizean, Europako Batzordeko presidente Jose Manuel Durão Barrosok hartu zuen Urkullu, eta Euskadiren egoera ekonomiko eta politikoa izan zituzten hizpide. Ondotik, Europako Batzordeko presidenteorde eta Lehiakortasun Batzordeko buru Joaquin Almuniarekin eta Barne Gaietako Batzordeko buru Cecilia Malmströmekin bildu zen.  

Gaur, Herman Van Rompuy, Europar Kontseiluko presidentearekin topaketa egingo du Lehendakariak eta bilera horrekin amaituko du bidaia.