euskalkultura.eus

Mallorca, Espainia. HABEk Euskara Munduan programaren baitan Europako Euskal Etxeetako euskara irakasle-topaketa eratu zuen iragan 17tik 20ra, Mallorcako Artea Euskal Etxearekin elkarlanean, 2013/2014 ikasturteari aurre egiteko.

Topaketa honetan profil oso desberdinetako irakasleak, eta tamaina zein izaera desberdinetako euskal etxeak bildu ohi dira, eta antolatzaileen esanetan oso aberasgarria da hori partehartzaileentzat.

"Batzuk adituak dira eskolak ematen; beste batzuk, aldiz, aurten izango dute lehenengo eskarmentua. Batzuk euskal etxe handietatik datoz, ikasle kopuru altua duten elkarteetai, eta beste zenbait, berriz, txikietatik", azaldu dio Euskalkultura.com--i HABEko teknikari Kinku Zinkunegik. "Irakasle berriei babesa ematen diegu eta erronkari aurre egiteko gutxieneko irizpide, material eta abar emateaz gain, oso lagungarri gertatzen zaie beste euskal etxeetan egiten denaren berri jasotzea".

Aurten, ikasleak zinemagile!

Aurtengoan helburu bikoitza izan du bilerak. Batetik, irakasleen esku jartzea gutxieneko baliabideak eta, bestetik, aurretik beraiekin adostutako hainbat gai jorratzea, normalean eskoletan izaten dituzten arazo/zalantzak argitu nahian. Esaterako, aurtengoan, proposaturiko gai nagusiak honako hauek izan dira:

-Nola kudeatu maila desberdina duten ikasleak talde berean.
-Nola eman ikasitako eduki formaletatik mintzamenerako jauzia.

Hain zuzen ere, bigarren gai horri erantzuna emateko, bileran erabaki da euskarazko eskoletan laburmetraiak egitea, klaseak dinamizatzeko. Horretarako, bileran laburmetrai bat egiteko prozedura landu da, alde didaktikoa zein teknikoa jorratuz.

Proposamen honen oinarrian dago Bartzelonako Euskal Etxeak urtero antolatzen duen laburmetrai lehiaketaren arrakasta, eta iaz Madrileko Euskal Etxeak lehen aldiz egin zuenak izan zuen harrera bikaina. Halatan, euskara ikasleek egindako laburmetrai lehiaketak Europako euskal etxe guztietara zabaltzea da ikasturte honetako erronketako bat.

Euskara eskolak dinamizatzeko ekintza oso aproposa dela adierazi dute irakasleek, prestaketa fasean ematen diren urratsak didaktizatzen direlako eta klaseko langai bihurtu. Bestalde, lehiaketak ikasleak motibatu egiten ditu eta sorkuntza prozesua zein grabazioa dibertigarriak izan ohi dira. 

Arteari esker ona

Amaitzeko, bileraren antolatzaileek eta partehartzaileek esker ona adierazi nahi diote Artea Euskal Etxeari, topaketarako elkartearen egoitza uzteagatik.

"Azpimarratu nahi dugu bertako arduradunek izan duten jarrera eta eskuzabaltasuna. Egoitza erabat irakasleon esku utzi dute, han egon garen egunetan eman diguten laguntza ezin hobea izan da eta topaketari bukaera emateko, urriaren 20an, guztientzako txango bat antolatu zuten. Eskerrik asko,  bene-benetan, Artea Euskal Etxeko arduradunei", esan du Zinkunegik.