euskalkultura.eus

Vitoria-Gasteiz. Etxepare Euskal Institutuak orotara 2.8 milioi euroko aurrekontua izango duela iragarri du aste honetan. Horietatik 783.856 kultura alorreko diru-laguntzak emateko izango dira (aurreko urtean baino %11.68 gehiago). Irakurletza sarea indartzeko 712.000 euro erabiliko dira (2011an baino %78.1 gehiago). Lehendabiziko urtean erakundea ezagutarazteko eta finkatzeko egindako gastua nabari murriztuko da 2012an, eta, horrenbestez, kultura nazioartean zabaltzeko eta irakurletza sarea bultzatzeko diru-laguntzak handitu ahal izango dira.

Horrez gain Kultura Sailak beste 59.732 euro emango dizkio irakurletza sareari, izan ere, sail honek   Birminghameko Unibertsitatearekin, Uruguaiko Errepublikaren Unibertsitatearekin eta Mexikoko UNAMekin hitzarmenak zituen Etxeparek programaren kudeaketa hartu aurretik. 2013tik aurrera, ordea, irakurletza sarea Etxepare Institutuaren esku geratuko da.

Euskal Zinea New Yorken

2012 urtean egingo dituen jardueren artean Etxeparek, besteak beste, hizkuntza gutxituekiko talde-lana sustatuko du, irakurleen formazioan lan egingo du eta katedra berriak sortuko ditu. Esaterako, Chicagoko Koldo Mitxelena katedra apirilean inauguratuko da. Halaber, datorren urteko martxoan euskara omentzeko jardunaldiak antolatuko dira Madrilen Euskaltzaindiarekin batera. Horiek guztiak, euskararen arloan.

Kultura alorrean, aldiz, diru-laguntzak berregituratu eta eskaerari begira moldatuko direla azaldu du institutuak. Era berean, institutuarentzat toki estrategikoak direnetan jarduerak indartuko dira: Madrilen, Bruselan eta New Yorken. Urtarrilean Etxepare Institutuaren aurkezpena egingo da Madrilen eta maiatzean New Yorkeko Lincoln Center-ean euskal zinemari buruzko atzera begirako erakusketa bat izango da.