euskalkultura.eus

Donostia-San Sebastian. Etxepare Euskal Institutuak deialdia egin zuen atzo bi irakurle hautatzeko: bat, Poznaneko Adam Mickiewicz unibertsitatean 2014-2015 ikasturtean aritzeko (luzatzeko aukerarekin) eta bestea 2014-15 ikasturtean Birminghameko Unibertsitatean aritzeko, luzatzeko aukerarekin hau ere.

Etxepare Euskal Institutuak aditzera eman duenez 26.000 euro bideratuko ditu ikasturteko Poznaneko Unibertsitatearekin egindako hitzarmenera eta 42.000 euro ikasturteko Birminghameko Unibertsitatearekin egindakora. Diru-kopuru hori osorik irakurleen kontrataziora bideratuko da.

Eskabideak aurkezteko lekua eta epea.

Eskabidea (I. eranskina) eta curriculum vitae-a islatzen duen taula (II. eranskina) helbide elektronikoz bidaliko dira, honako helbidera: etxepare@etxepare.net.

NANaren kopia aurkeztu beharko da bi agiri horiekin batera.

Hautagaiek ez dituzte euren CVan aipatutako merituak dokumentu bidez egiaztatu beharko eskabidea egitean, baina aurkeztu egin beharko dituzte hautatuak badira. Hautagaiek aipatzen dituzten meritu guztiek (hizkuntzak, emandako ikastaroak, jasotako formazioa….) ziurtagirien bidez frogagarriak izan beharko dute.

Balorazio batzordeak elkarrizketa egin ahal izango die hautagaiei.

Informazio osoa eta hautagaitzak aurkezteko agiriak, hemen.