euskalkultura.eus

New Jersey, AEB. Jersey Chonicle aldizkariko kazetari eta arte aditua, John Gomez, izan zen urte hasieran Berasaluceren lana goraipatzen lehena. Artista debatarraren lanak Hudson County-ko eliza askotan ikus daiteke, New Yorketik oso gertu.  ‘Bayonne-ko St. Henry's, Jersey City-ko St. Peter's eta West new York-eko St. Augustine's artelanak dira', zioen Gomezek, 'eta denek amakomunean dutena erdiaroko ukitua zuen maixu moderno batek eginiko beirate koloredunak dira'.

Bestalde, New Yorkeko Euskal Etxeak joan den larunbatean txango berezi bat antolatu zuen elkarteko kideek eta hainbat komunikabidek euskal artistaren lana zuzenean ezagutzeko aukera izan zezaten. Emilia Doyaga euskal amerikarra izan zen ideiaren sustatzailea eta txangoak Newarkeko Artxidiozesiaren baimena lortu zuen New Jerseyko hainbat eliza bisitatu ahal izanteko. Ibilaldiaren egitarauan Hiemer estudioetan, 20 urtez Berasaluceren lantokia izan ziren lekuan, geldialdia ere agertzen zen. 

Sacre Cour-eko beirateak

Auñamendi Entziklopediak azaltzen duenez, Berasaluce Deban jaio zen 1912ko apirilaren  25ean. Gaztetan arte sakratua ikasi zuen Bartzelonan eta 1931an beirateen munduan hasi zen Madrilen, B. Kruppel maisu alemaniarrarekin. Kruppelekin Sevillan lanean aritu zen katedraleko beirateen berritze lanetan. Gero ikasketak jarraitu zituen Pariseko Maumejean etxean eta 12 urtez bertan egin zuen lan.

1945 urtean Montmartreko Sacre Coeur eliza ezagunerako egin zituen proiektuek saria jaso zuten Pariseko Arte Eder Eskolan eta bere beirateak hiriko Carnavalet Museoan izan ziren ikusgai. 1952an AEBtara joan zen eta New Yorken Joep Nicolas holandarrekin egin zuen lan AEBetako eliza eta sinagogetarako. Bere lan nagusien artean Princetongo St. Paul's Church-eko beirateak daude. Donostian hil zen 1993ko martxoaren 11an. [Eskubiko irudian Simon Berasaluce artista euskalduna New Yorkeko Hiemer estudioen parean]