euskalkultura.eus

Buenos Aires, Argentina. Chascomuseko Zingirako Euskaldunak euskal etxeko Sebastian Errecart-ek eta Buenos Airesko Laurak Bat-eko Pablo Ubiernak honako argudioz defendatu dute euren proposamena: “Euskal Pilota euskal immigranteek utzi diguten ondare garrantzitsuenetako bat da; hemen asko zabaldu da eta herri edo auzo askotan daude pilotalekuak dituzten klubak. Euskal pilota modalitateen artean badaude bi gaur egun babes berezia behar dutenak. Horiek Esku Pilota eta Xare dira (…). Gure ustez, euskal kolektibitatea bera da bi kirol hauei bultzada eman behar diena, euskal jatorririk ez duten erakundeek ez baitute inola ere egingo. Bultzada eta babes horiek gainera bi emaitza emango lituzkete: kirolaren aldetik, pilotarien trebakuntza eta Argentina ordezkatzeko elite taldeak sortzea; eta, kulturaren aldetik, Euskal Herriko beste kultur adierazpen bat zabaltzea”.

Argudio hauekin, Errecart-ek eta Ubierna-k beste datu bat ere azpimarratzen dute: “egia da euskal etxe askotan egon direla nazioarteko lehiaketetan parte hartu eta irabazi duten hainbat pilotari; baina kasu horiek ez dira izan euskal etxeak garatutako proiektu baten emaitza, baizik eta pertsona baten lorpena. Are gehiago, kasu gehienetan pertsona horiek ez zuten izan zegozkien babesa ezta laguntza ekonomikoa. Eta jakina, haien esperientziak ‘galdu’ egin ziren eta ez ziren aprobetxatu pilotari berriak trebatzeko”.

Azaldutako egoera aldatzeko asmoz aurkeztu dute proiektua FEVAn Zingirako Euskaldunak eta Laurak Bat euskal etxeek. Federazioak maiatzaren 10eko bilkuran onartu zuen eta aste honetan jarri du martxan interesatuen datuen bilketa.

Zer, nori eta nola

Proposamena Esku Pilota eta Xare irakatsi nahi duten Argentinako euskal etxeei dago zuzenduta. Proiektuak hiru arduradun izango ditu, hiru mailatan bereiztuta: FEVAko kirol saileko ordezkariak (1. Maila); euskal etxeko pilota saileko ordezkaria –ordezkaria irakaslea bera izango da, bitartekoak saihesteko– (2. Maila); eta pilotariak (3. Maila).

Aktibitatea abian jartzeko euskal etxeak izan behar du: ordezkari bat, pilotaleku egoki bat (pilotalekurik izan ezean, herriko klubekin hitzarmenak egiteko informazioa jasoko du euskal etxeak); eta animoa, proiektua epe luzerako baita.

Hiru baldintza horiek betetzen dituen euskal etxeak, ‘lan talde’ baten laguntza izango du, proiektuaren lehenengo fasean. Fase honetan, trebakuntza eta materialak jasoko ditu euskal etxeak. Aipatu behar da materialak FEVAk eskuratu eta kudeatuko dituela.

Parte hartu nahi duten –edota informazio gehiago nahi duten– euskal etxeek FEVArekin kontaktatu behar dute feva2000@fibertel.com.ar helbidera edo Sebastian Errecart (serrecart@hotmail.com) edo Pablo Ubierna (pabloubierna@hotmail.com) proiektuaren egileekin.