euskalkultura.eus

Puerto Iguazu, Argentina. Euskal jatorririk izan ez arren Argentinako euskal diasporarentzat garrantzi handia duen pertsonaia baten istorioa kontatuko du Maximiliano Gonzalez zine zuzendariak laster hasiko duen proiektuan. “Euskal etxeen munduarekin ere ez dut harremanik; noizbait kontaktuan jarri izan naiz Guillermo Larreguiri buruzko informazioa eskatze aldera, baina besterik ez”, azaltzen du Gonzalez-ek. Baina euskal giroetatik hurbilk ez egon arren, iruinseme honen historiak harrapatu egin du eta horixe da hain zuzen datozen hilabeteetan pantailetara eramaten saiatuko den kontakizuna.

“Puerto Iguazukoa naiz eta oso txikia nintzela ezagutu nituen Guillermo Larreguiren pasadizo eta bizipenak”, kontatu dio Gonzalez-ek EuskalKultura.com-i. “Garai hartan oso arrunta zen Iguazuko ur jauzietara paseatu edo bainu bat hartzera joatea eta bertako jende helduak 'Eskorgako Euskalduna'ren istorioa kontatu ohi zigun edo artean zutik zeuden bere etxearen zati batzuk erakusten zizkigun. Beraz, irudi horrekin hazi nintzen, pertsonaiarengandik oso hurbil”, diosku Gonzalezek.

Baina sortzaile baten buru barnean hamaika istorio eta kontakizun ibili ohi denez, zergatik hain zuzen Larreguirena aukeratu, galdetu diogu Maximiliano Gonzalez-i: “Bat baino gehiago dira Larreguiren nortasunetik erakarri ninduten gauzak; egin zuen ahalegin fisikoaz gain gailendu nahi dut ametsak eta askatasuna lortzeko gizakiaren borroka eta horri buruz utzi zigun irakaspena. Hogeita bi mila kilometro egin zituen eskorga eskuetan eta horrekin batera pertsonaiak egiten duen barne bilaketak liluratzen nau gehien; 50 urterekin hasitako ibilbidean bere burua aurkitu zuen”, azaltzen du zuzendariak.

Dokumentala egiteko iturriak

Gonzalezek iturri zuzenak landu ditu dokumentala egiteko. “94 urteko Jose Gorgues jauna Iguazuko ur jauzietako parkeko lehenengo zaindaria eta Larreguiren laguna izan zen eta urte askotan haren gauzak gorde zituen  – Larreguik berari utzi baitzion dena – eta gauza horien artean iruinsemeak bere bidaietan osatzen joan zen karpeta eta paper-bildumak, egunkari zati, argazkiak eta hausnarketa batzuk daude. Dokumentalean gizonaren ibilbidea berreraiki dut, 1969. urtean, ur jauzietan eta bakarrik. Larreguiren pentsaera eta gogoetak berreskuratu, berak utzitako testuak eta Iguazuko jendearen lekukotasunak baliatuz”.

'Eskorgako Euskalduna' dokumentalak Argentinako Zinema Institutuaren saria jaso du otsailean, eta Telebista Digital berrian erakutsiko da. Hogeita sei minutuko luzera izango du eta Gobernu Nazionalaren babesa, diru-laguntza bidez. Egileen asmoa filmazioa apiril edo maiatzean hastea da, Iguazun bertan, eta irail aldera aurkeztea.

Maximiliano Gonzalez zinemagilea 1972an jaio zen Puerto Iguazun. Ikasketak Rosarioko Zinema Eskolan egin zituen, baita INCAAn eta Los Angelesko Unibertsitatean ere. Bere lanak nazioarteko zinemaldi askotan eman izan dira, Paris, New York, Viña del Mar, La Habana, Kiev eta Valdiviakoetan esaterako, batzuk aipatzearren.