euskalkultura.eus

Errenteria, Gipuzkoa. Musikaren Euskal Artxiboak Errenterian, Donostiatik oso gertu, du egoitza fisikoa. Egoitza birtuala, aldiz, www.eresbil.com webgunean du eta bertatik bere artxiboetan bilaketak egin eta materiala bidaltzeko eskatzeko aukera ematen du. "Gauza desberdin asko eskatzen ditu jendeak: partiturak, grabaketak, dokumentazioa...", azaldu dio EuskalKultura.com-i Eresbileko Pello Leiñenak.

Eskariak Euskal Herritik eta munduko bazter askotatik heltzen omen zaizkie, eta munduko horien artean euskal Diasporako koru, musika talde eta ikerlariek badute lekurik. "Argentinatik, Parisetik.. euskal etxe desberdinetatik heltzen zaizkigu eskariak. Pariseko Anaiki korua, edo Buenos Aireseko Lagun Onak, adibidez, ederki ezagutzen ditugu", gehitzen du Leiñenak. Aurki webguneak Uruguaiko euskal musikagile eta musikazaleei buruzko ikerketa bat argitaratuko du, Eneko Sanz eta Alberto Irigoyen ikerlariek Zelaia Bekaren laguntzarekin burutu zutena, hain zuzen ere. "Webgune tematikoen atalean plazaratuko dugu", azaltzen du Eresbileko kideak.

Katalogoak eta direktorioa

Eresbilen webgunean katalogoan bilaketa desberdinak egin daitezke: Euskal musika-partiturak, Euskal Musikaren bibliografia edo Katalogo orokorra ataletan. Behin dokumentu bat aurkituta, Eresbilekin harremanetan jarri eta postaz bidaltzeko eskaria egin behar da. Kasu batzuetan, aldiz, dokumentua sarean bertan egon daiteke eskuragarri.

Webguneak Direktorio bat ere eskaintzen du eta bertan Euskadiko eta Nafarroako musika munduko talde, erakunde eta profesionalen bilaketa egin daiteke. Bukatzeko, 'Beste zenbait esteka' atalean interesgarriak izan daitezkeen hainbat webgune aipatzen dira. "Momentuz gure direktorioan ez dira agertzen Diasporako euskal abesbatzak edo musikariak, baina haien informazioa izan nahiko genuke noski. Gurekin harremanetan jartzeko eta informazioa bidaltzeko gonbitea egiten diegu", bukatzen du Leiñenak.

Zure abesbatzari edo taldeari buruzko informazioa bidali nahi izanez gero, idatzi e-maila hona.