euskalkultura.eus

Rio Cuarto, Argentina. “Iazko bileretan adostu genuena jarraituz, komunitate osoarentzat zuzendutako ekintzak egiten ari gara 2011. honetan. Ateak zabalik dituen etxea izateak ekitaldi batzuk egoitzatik kanpo antolatzera eramaten gaitu, jende gehiagorengana hurbildu ahal izateko”, azaltzen dute euren buletinean Gure Ametza euskal etxeko kideek. Eta euskal etxetik kanpo burututako azken ekintzetako bat Cesar Arrondo irakaslearen hitzaldia izan da.

Euskal Etxeak, Rio Cuartoko Unibertsitate Nazionaleko Ikasleen Guneak eta Unibertsitateko Zientzia Politikoetako Departamenduak antolaturik, “Euskal Herriko gatazka politikoaren hasiera eta eboluzioa” izeneko hitzaldia eman zuen Arrondok ekainaren hasieran.

[Cesar Arrondok Rio Cuartoko Unibertsitatean emandako hitzaldia]

Euskal etxetik kanpo ere Maiatzaren Iraultzaren eguna ospatu zuten Rio Cuartoko euskaldunek. Hainbat herritan gertatu zen bezala, Gure Ametza-ko ordezkariak ere atera ziren kaleetara herriko kabalkadan parte hartzeko. Euskal etxearen izenean, Cynthia Sanchez, Valeria Echandia, Sergio eta Frantzisko Eguiazu, Manuel Campoamor eta Andoni Arguello Bilbaok Argentinako bandera eta ikurrina eraman zituzten “Puente del Bicentenario-Bigarren Mendeurreneko zubitik”.

[Rio Cuartoko euskaldunak herriko kabalkadan]

Eta kirola ere nazio baten kulturaren zati garrantzitsua da. Rio Cuartoko euskaldunek ondo asko dakite hau eta gogor entrenatzen dute pilota paletan zein esku-huska. Astearte eta ostegunetan elkartzen dira pilotariak frontoian, “Banco Nacion” klubean eta parte hartzeko gonbitea luzatzen diete interesa duten guztiei.

[Rio Cuartoko pilotariek dena uzten dute pilota lekuan]

Aitatu, azkenik, 'Klasikoen IV. Irakurraldia' gauzatu zela atzo Bilbon eta han ere egon zirela Rio Cuartoko lagunak. Ekitaldiko antolatzaileek gonbidaturik, Gure Ametza-ko Cecilia Irusta, Iñigo Landera, Pablo Cufre eta Gustavo Echandia bazkideek Ramon Saizarbitoriaren "Hamaika Pauso" eleberriaren 58. pasartea hurbildu zioten Arriaga Antzokian bildutako publikoari bideo baten bidez.