Bolívar, Argentina. Pasa den larunbatean, otsailaren 11n, Bolivarko Nafar Etxeak 69 urteko jarduera ospatu zuen Buenos Aires probintziako hiri honetako Venezuela kalean duen egoitzan. Ehun lagun eta bazkidetik gora bertaratu ziren nafar jatorria daukaten lagunen bilgarri den erakundearearen urtebetetze jaiaz gozatzera. Dantzak, zozketak eta menu bikaina izan ziren gaueko osagai, urteurreneko tarta handi bat eta topa-egitea barne.
“Pandemiak eragindako etenaldiaren ondoren, urtebetetzea ospatzeko bildu ginen berriro. Emozio handiko gaua izan zen. Nafar Etxeko dantza taldeak hartu zuen parte, guztiok oso harro sentitzen gara taldeaz, eta jendeak sano txalotu eta zorionak eman zizkion”, adierazi dio Nafar Etxeko lehendakari Mariana Sardónek Euskalkultura.eus-i.
Argentinako Nafar Etxeen hurrengo Topaketako egoitza
Diego Sarchione Dj-aren musikalizazioak girotu zuen jaia. Bera da, gainera, astearte ilunabarretan Nafar Etxean tango-eskolak eman dituena. Horretaz gain, zentroak beste jarduera batzuk ere eskaintzen dizkie parte hartu nahi dutenei. Ostegunero, Sandra Santosen gidaritzapean, abesbatzak entseatzen du, eta dantza taldea, Luisina Teruelen eskutik, larunbat arratsaldetan elkartzen da.
Egun batzuk baino ez dira igaro 69. urteurreneko afari-elkarretaratzea egin zenetik, arrakastaz egin ere, eta. Bolivarko Nafar Etxeko kideak hasiak dira dagoeneko hurrena den 70. urtebete biribileko ospakizunetan pentsatzen, eta gogoan daukate ia lau urteren buruan Argentinako Nafar Etxeen XII. Topaketako anfitrioi izango direla, Mendoza izan ondoren, joan den abenduan, azkeneko antolatzaile. Zorionak!
Lagun bati bidali
Komentarioa gehitu
