euskalkultura.eus

Buenos Aires, Argentina. Ekainaren 7 eta 8an burutu zen hiriburuko Avellaneda Parkean 2014ko Buenos Airesko Folk Open Air Jaia. Hiriko Kultura Ministerioak bultzaturik, eskualde honetan nahiko ezohikoak diren ekintza anitz garatu ziren bi egunetan zehar kalitate handiko ikuskizunak batuz.

[Bigarren urtez jarraian, Ekin Dantzari Taldea  Folk Open Air Jaialdian (argazkiaEE)]

Programari dagokionez, Erdi Aroko Azokaz aparte, honako artista eta emanaldi hauek ikusi ahal izan ziren parkeko tauletan: Eire (dantza irlandarrak), Greenfolk (folk irlandarrak), Arme (errekreazionismo ikuskizun eskandinaviarra), Fiesta Noz! (Bal Folk), Valherjes (Erdi Aroko esgrima), Viejos Contrabandistas (folk irlandarra), Batalla Final (errekreazionismo ikuskizunak), Einher Skald (folk bikingoa), Andayna (folk iberiarra), Huldreslaat (folk nordikoa), Tio Apó (umeentzako jolasak), Zrymgool (Metal Folk), Skull & Bones (Metal Folk) eta Mac Manus (folk irlandar-eskoziarra).

[Jantzi eta dantza tradizionalekin, Ekin Dantzari Taldeak euskal kolektibitatea ordezkatu zuen (argazkiaEE)]

Hauekin batera, Euskal Herriko ohiko musika eta dantzak ere iritsi ziren Avellaneda Parkera, Buenos Airesko Ekin Taldearen eskutik. Lizarraenea egoitza duen taldea igande arratsaldean jendaurretu zen eta Eurtako aurreskua, Esku Dantza, Marmutx, Orbaitzeta eta Biribilketa dantzatu zituen, azken bi hauek publikoaren partaidetza eskatu eta lortuta.