euskalkultura.eus

Madril, Espainia. Madrilgo Euskal Etxeak iragan urriaren 6ean egin zuen 2012ko Euskal Jaia eta Espainiako hiriburuko euskaldun eta euskaldunen lagun asko bildu ziren festara. Bisitarien artean izan zen ere Julian Celaya, Euskal Herritar eta Gizataldeentzako zuzendaria.

Jaia Retiro parke ezagunean egin zen eta Euskadiko eta Madrilgo arraun taldeen desafioarekin hasi zen. Irabazleak Club de Remo Retiro taldekoak izan ziren, aurreko bi edizioetan bezala.

Egunean zehar talde asko pasa ziren Retiron jarri zen eszenatokitik. Goizean Irrintzi dantza taldea, Bilbao Mapa Mundi taldea eta Kukai konpainia aritu ziren. Euskal Etxeko iturrien arabera ikuskizunak "sekulakoak izan ziren: Irrintzik hunkitu egin gintuen, BilbaoMapaMundikin dibertitu egin ginen eta Kukaik harritu eta liluratu egin gintuen".

Arratsaldeko protagonistek ere onena eman omen zuten: "euskal etxeko dantza taldeak ikusleak dantzan jarri zituen; Orfeoiaren kontzertua zoragarria izan zen (Zamanillo zuzendaria oso grazioso aritu zen kanta bakoitzari buruzko azalpenak ematen) eta, zer esanik ez Iñaki Plazaren taldearen kontzertua, lan ezinhobea egin zuten". 

Madrilgo Euskal Etxeak argazki sorta zabala argitaratu du bere webguneko Gure Argazkiak atalean, eta bideo ugari jarri ditu GURE BIDEOAK sailean ere.