euskalkultura.eus

Montevideo, Uruguai. Martxoaren 1ean bete ditu 32 urteak Montevideoko Haize Hegoak eta, aurreko urteetan ez bezala, aurten ezin izan dute jairik egin. Pandemiagatik Uruguaiko hiriburuan elkartzeko aukera oraindik mugatua denez, sareetan egin zituen Elkarteak bi deialdi. Alde batetik eskatu zien lagunei Euskal Etxearen muina hitz batez adierazteko. Zerrendan, gaztelaniazko eta euskarazko hitzak agertu ziren, euskarazkoetan ‘adiskidetasuna’, ‘lagunak’ eta ‘udaleku’, konparazio, eta gaztelaniaz ‘familia’ (sendia), ‘abrazos’ (besarkadak) eta ‘alegría’ (poza), batzuk aipatzearren.

Hitzez gain, une partekatuen argazkiak bidaltzeko ere eskatu zuen Euskal Etxeak. “Covid-19gatik ez dugu aurtengoan elkartzeko aukera izan, beraz distantzian ospatu genuen, baina elkarrekin, beti bezala” adierazi dio Euskal Etxeko erreferente Mariel Fernández Artasánchezek EuskalKultura.eus-i. Ikus argazkiak hemen.

2021eko zikloa hastear dago eta Uruguain, Hego Amerikako eta munduko gainerako herrialdeetan bezala, ez dago oso argi nola jarraituko duen osasun egoerak. Hala ere, hainbat ekintza iragarri ditu dagoeneko Euskal Etxeak bere egutegian eta aurrez aurre edo on line egingo ditu, une bakoitzeko egoeraren arabera.

Urteko lehenengo proposamena, emakumeen hilabetean, ‘Euskal emakumeak historiaurrean’ izenburuko hitzaldia izango da, martxoren 24an da, arratsaldeko 7:30etan, Zoom plataforman, Maite Bengoaren ardurapean.

(Bide batez, Zorionak euskal elkarteari!)