euskalkultura.eus

Muga guztien gainetik jauzi egingo du oraingoan ere Korrikak, AEK euskaltegi sareak antolatzen duen euskararen aldeko lasterketak, Diasporak munduan zehar antolatuko dituen ekitaldiei esker. Dagoeneko ekitaldiak iragarri dituzte Habanan, Liman, Shanghain, Sydney-n, Parisen, Valentzian, Edinburgon, Mexiko DF-n, La Platan, New Yorken, Boisen.. Hitzordu horien eta gehiagoren berri, jarraian.

Donostia-San Sebastián. Korrika 19k Euskal Herria alderik-alde zeharkatuko du aurki: Urepeletik irtengo da martxoaren 19an eta Bilbora iritsiko da martxoaren 29an, "Euskahaldun" leloa eta helduen euskalduntzearen aldeko deia zabalduz. Eta, beste behin ere, Diaspora buru-belarri sartuko da ekimenean, munduan zehar lasterketaren aldeko ekitaldiak antolatuz.. Apurka-apurka, guregana heltzen hasi dira dagoeneko ekitaldi horietako batzuen deialdiak, eta, beti bezala, horien guztien berri emango dizuegu EuskalKultura.com-en.

Momentuz, Diasporan Korrika 19ren alde antolatzen hasiak diren batzuk aipatuko ditugu. Zenbait tokietan aurrenekoz egingo dira ekitaldiak, esaterako Habanan (Kuba), Edinburgon (Eskozia), Liman (Peru), Cancunen (Mexiko) eta Marsellan (Frantzia). Abisu bat: Edinburgon ekitaldia antolatzen ari diren euskaldunek larunbat honetan spota grabatuko dute eta handik dabiltzan euskaldunei bertan ateratzeko gonbitea luzatu diete (informazioa, gure Agendan).

Parisen ere spot-a grabatu dute lasterketa antolatzen ari diren Eskual Etxeko lagunek eta sare sozialetan ikusgai dago jada (Pariseko lasterketa martxoak 7an izango da).

Horrez gain, aurrekoetan ere ekitaldiak antolatu dituzte "beteranoek" ez dute hutsik egingo: Madril, Bartzelona, Valentzia, Shanghai, Sydney, Mexiko DF, Boise, New York, Txileko Santiago, Buenos Aires, La Plata, Necochea, Berlin, Belfast, Québec... Beste hitzordu batzuk, Etxepare Euskal Institutuak munduan zehar dituen Euskara eta Euskal Kultura irakurlegoek antolatuak izango dira: Leipzig (Alemania), Warsaw (Polonia), Hungaria, Liverpool eta Santa Barbaran (AEB), besteak beste.

Amaitzeko, aipatu Quebeceko eta Pariseko euskal etxeak Diasporako Korrika ekitaldiei buruzko bideo bat egiteko asmoa agertu dutela. Horretarako, herrielde desberdinetako Korrika ekitaldiak grabatu eta bideoa eurei bidaltzea eskatu dute. Beraiek montajea egingo dute eta horrela Korrika munduan zehar ikusi ahalko da emaitzan. Informazio gehiago eskatzeko idatzi Montrealeko Antton Curutchet-i, hona.

Ez dira denak, noski, ekitaldi batzuen berririk ez dugulako jaso oraindik, edo hainbat lekutan une hauetan hasi direlako antolatzen. Datozen asteetan gure zerrenda hau osatuko dugu (gure Agenda atalean) eta, beste behin ere, gertu-gertutik jarraituko dugu Korrika mundial honen ibilbidea www.euskalkultura.com-en. Aurrera!

[Zure euskal etxean edo hirian antolatu den Korrika ekitaldiren baten berri bidaltzeko, idatzi info@euskalkultura.com helbidera. Eskerrik asko!)]