euskalkultura.eus

Necochea, Argentina. Ostiraletik aurrera Necocheako Euskal Etxeak San Sebastian Eguna ospatuko du eta, urtero legez, bestaren protagonista nagusienetako bat elkartearen danborrada ezaguna izango da. Astebeteko atzerapenez ospatuko dute Necocheako euskaldunek aurten jaia (San Sebastian eguna berez urtarrilaren 20ean da); izan ere, iragan asteburuan Gizataldeen Azokako ekitaldietan murgilduta ziren.

Elkarteak stand batekin parte hartu zuen Miguel Lillo parkean jarri zen Azokaren gunean, eta bertan euskal sukaldaritza dastaketa eskaini zuen. Horrez gain elkarteko dantzariek, Gazte Alai taldeak, erakustaldia eskaini zuten.

Ostirala eta larunbata

Egun handia larunbata izango da eta Euskal Etxean egingo den Afari eta Dantzaldi batekin ospatuko da jaia. Afariaren menuko izarra Paella Erraldoia izango da, baina ziurrenik bisitari gehienak danborradaren abarrotsaz gozatzeko aukera bikain honengatik hurbilduko dira bertara.

Euskal etxeko danborradak Argentinako beste euskal etxeetako danborrariak ere gonbidatuko ditu jotzera eta, aurreko urteetan bezala, bertan izango dira Mar del Plata, Bahia Blanca, Laprida edo Buenos Airesetik etorritako partaideak.