euskalkultura.eus

Corpus Christi, Argentina. 2009an hasi zuen ekimenari jarraiki, Corpusko Eusko Etxeak, Misiones probintzian, bigarren edizioa antolatu dio "geure inguruko jendeak ohoratu" helburu duen programa honi, "egiten duten lanetik bizi, pozik lan egin eta komunitatearen mesedetan ari diren zenbait herritarrei" euren jarduna aitortu nahian, azaltzen du Olga Leiciagak. Ekitaldia maiatzaren 2ko, esan nahi baita datorren igandeko goizeko hamarretatik aurrera gauzatuko da, aurtengoan honakoak direlarik omendutako herritarrak:

-Guillerma Martínez Basabe (Posadas-koa): "Eusko Etxeko laguntzailea eta Zuzendaritza Batzordeko kidea. Egiten ditugun sukaldaritza kontuetan geure ardatza da, eta pozik eta dedikazioz ari da bet lanean".
-Alejandro Romero (Corpus): "Ciber bateko nagusia, pazientzia eredugarrikoa, lanean arduratsu, sormen handikoa argazkigintzan".
-Hilario Reyes (Puerto Leoni): "Misionesko bertako jatorriko herrietako kide, zura maisutasunez lantzen du, miniatura animaliak egiten ditu".
-Carlos Gabriel Sersing (Corpus), "nekazaritza arloko ekoizle eredugarria".
-Hilda Vanderdorp (San Ignacio), "San Ignacio herriko Kultura Zuzendaria eta Corpusko Eusko Etxeko laguntzaile handia".
-Tomás Darío González (Gobernador Roca): "supermerkatu bateko enplegatu atsegin, maitagarri, abegikor, alai eta arduratsua".
-Nacho Sersing: "eredu diren gazteen adibide, langilea, ondradua, sormena duena, politesiaduna, aurrera begiratzen duena".
-Patricia Duarte (San Ignacio): "irakaslea, bertako jatorriko herrietako haurren bokaziozko errientsa maitagarria".

Ekitaldia ongi etorri hitz batzuekin hasiko da, Eusko Etxeko lehendakari Olga Leiciaga eta autoritateak mintzatuko direlarik, besteak beste "Argentinara Euskal Herritik etorri ziren euskaldunak" aipatuz, "portaera eredugarrien jabe, lan, alkartasun eta ondradutasun adibide izan zirenak". Jarraian omenaldiaren zati nagusiari ekingo zaio, omenduak aurkeztuz, zenbait herritar partaide, ondoren mokadu batzuk zerbitzatzeko. Zorionak omenduei eta ideia gauzatzen lagundu dutenei.