euskalkultura.eus

Córdoba, Argentina. [OHARRA: aipatutako taldearen izkribu eta salaketa 'Gure Txokoa'ren barnean zabaldu da, baita Argentinako beste euskal etxe batzuetan, eta joan den astean Euskal Herrira ere iritsi zen, Berria egunkariak eman baitzuen argitara. EuskalKultura.com-en ere hartu genuen izkribua argitara genezan. Ohartuz talde sinatzailearen artean ibilbide ezaguneko euskaltzaleak eta euskal kulturaren aldeko langile finak daudela, harremanetan jarri ginen Alejo Martin euskal etxeko lehendakariarekin, salaketei buruz esatekoa zutena ere jasotzeko. Erantzun bakarra izan da geroztik makina bat ohar eta berri zabaldu dituela euskal etxeak zenbait arlotan egiten segitzen duen lana azpimarratuz, talde salatzailearen laguntzarik gabe bada ere. Jarraian, salaketaren edukiaren berri ematen dugu, eta beste berri batzuetan, euskal etxetik jasotako beste informazio horiena]

Txot Taldeko dantzariek, Baietz musika taldeak, Txalaparta, Txistu, Alboka eta euskal musika tresnen tailerretako ikasleek, Euskara ikasleek, Txikientzako musika, dantza eta euskara klaseen arduradunek, eta Euskara eta Euskal Kultura tailerreko ikasle eta irakasleek Cordobako Gure Txokoa Euskal Etxeak "euren kontra" hartutako neurriak hedatu dituzte. Salaketa gutunean, aipatutako pertsonak, guztiak instituzioko bazkideak, maiatzetik hona bizitzen ari diren egoera azaltzen dute.

“Alejo Martin buru duen batzordeak erabaki zuen euskara klaseen ordutegia murriztea, Euskal kulturari buruzko tailerra bertan behera uztea, eta txikientzako musika, dantza eta euskara tailerra etetea (…). Horretaz gain, Noe Fernandez Brizuela eta Elba Mocoroa FEVAk euskara irakasteko emandako izendapena baztertu du (…); eta Baietz musika taldeak eta Txot Dantza taldeak saioak egiteko zeukaten lekua kentzea ere erabaki zuen euskal etxeak” dio eskutitzak.

Euren ekintza guztiekin jarraitzen dutela adierazten dute salaketaren arduradunek, baina euskal etxetik kanpo. Gutunaren bidez, Alejo Martin lehendakaria eta berak zuzentzen duen batzordea “Euskal Etxeko estatutuen helburuak eta aginduak ukatzen dituzten neurrien” erantzule egiten ditu taldeak.