euskalkultura.eus

Comodoro Rivadavia, Argentina. 86. urteurrena ospatu du Comodoro Rivadaviako 'Asociación Euskal Echea'k pasa den maiatzean. Data berezi hori bertako komunitatearekin partekatzeko asmoz, Eusko Jaurlaritzak bidalitako ‘Euskal musika tresnak eta baserriak’ argazki erakusketa antolatu zuten, bertako CEPURreko instalazioetan. Erakusketaren inaugurazioa maiatzaren 21ean gauzatu zen, Hector Baztanen eskutik. Baztanek, euskal elkartearen urtebetetzeari buruzko hitz batzuk luzatu zizkien bertaratu zirenei eta argazkien esanahia azaldu zuen. Ekitaldi berean, ‘Lagun Artean’ etxeko abesbatzak euskal abesti pot-pourri bat kantatu zuen. Baina hau ez zen koruaren errezital bakarra izan. Hurrengo egunean, beste emanaldi bat eskaini zuten abeslariek, kasu honetan errepertorioa euskarazkoa zein gaztelaniazkoa, esan nahi baita folklore argentinarreko kantak ere kantatu zituzten.

[Comodoro Rivadaviako euskal abesbatza]

Igandean, maiatzaren 24an, berriz, dantza taldeen txanda izan zen. ‘Haize Dantzariak’ taldeko dantzariak ekin zieten dantzei. Oscar Mirandak Aurreskua dantzatu ondoren, bertan ziren dantzari guztiek Arin-Arin-eko bi bertsio egin zituzten.  Jarraian eta ikuskizunari bukaera emateko, txikiek, Maite Baztan eta Laura Alvarengo irakasleekin, dantza biribil bat egin zuten. “Pozik gaude jende asko bildu delako”, azaldu zuten antolatzaileek. “Horregatik eskerrak eman nahi dizkiegu bai Eusko Jaurlaritzari bai Comodoroko Udalari euren laguntzagatik; eta, jakina, euskaldun eta euskaldunen ondorengo guztiei mementu hain garrantzitsu batean gure ondoan egoteagatik”.

[Lilian Borquez euskara irakaslea eta bere ikasleetako lau (argazkia EuskalKultura.com)]

Euskal Etxeko asteko ekintzak

Beste alde batetik, nabarmendu beharra dago euskal etxeak berriro zabaldu duela aurten euskara ikasteko talde bat. Klaseak apirilean hasi dira eta sei lagunek hartzen dute parte. Irakaslea --Lilián Borquez-- comodorotarra da eta Argentinan Euskaraz proiektuan, Nazioarteko Taldeko ikaslea. Klaseak larunbatero arratsaldeko 4etatik 6etara ematen ditu. EEko abesbatza ere astero elkartzen da entseatzera. Susana Martinovic zuzendariarekin, larunbateetan arratsaldeko 6etatik 8etara biltzen dira abeslariak euskal etxeko egoitzan.