euskalkultura.eus

Ian Buchanan sukaldariak euskal jakiak prestatzen irakatsi zien, atzo, Colorado-ko Breckenridge herriko CM eskolara hurbildutako hamabi ikasleri. Lepo zegoen klasea, hori baita izan zezaketen ikasle kopuru gehiena, eta itsaski eta arrainean oinarritutako menua prestatu zuten. Irakasleak EuskalKultura.com-i adierazi legez, “euskal kulturaz ezer gutxi jakin izanak erakarri egin du jendea”.

Breckenridge, AEB. Itsaski erregosia euskal erara, berakatza saltsan egindako izkira salteatuak, tomate eta piperrekin prestatutako arrain freskoa eta, postre gisa, buñuelo edo kruxpetak. Hori izan zen atzo Colorado Mountain College ikastetxera hurbildutako dozena ikasleek ikasitako menua: “90-100 sukaldaritza saio ditugu urtean zehar, edonori irekiak, batzuk eguneroko kontuak ikasteko dira, pizzak, ogia zein jaki begetarianoak kasu, baina beste batzuk munduko sukaldaritzara hurbiltzeko erabiltzen ditugu”.

Hemeretzi urteko esperientzia dauka Buchananek sukaldean, eta ez AEBetan bakarrik: Erdialdeko Amerikan, Asian, Afrikan eta Europan ibilia da ere. “Kadizen (Espainia) bizi nintzen hainbat urtez, eta eskolako buruak Espainiako sukaldaritza eskolak antolatu nahi zituela esan zidanean euskaldunena aukeratu genuen ere, guztien artean bereziena delako”.

Denentzako eskola praktikoak

Hamazazpi eta laurogei urte arteko ikasleak izan ohi dituzte CMCn, Buchananen berbatan. Baina gehienak 40 eta 55 urte bitarteko emakumeak izan ohi dira. Beharrezko guztia duen sukaldea eremua dute beren esku jaki-zaleek, beraiek landu ditzaten azaltzen ari zaizkien jatekoak. Atzoko euskal eskolagatik 44 dolar ordaindu zituen pertsona bakoitzak.

Ian Buchanan-en webgunea
Wall Street Journal egunkariak Buchanani buruz argitaratutako artikulua