euskalkultura.eus

Chicago, AEB. Txakoholika gastronomia dastaketaren hirugarren edizioak txakolina, sagardoa eta pintxoak ekarri zituen Chicagora eta egun batez bederen hiri amerikarrean Euskal Herriko edozein tabernakoa bezalako giroa bizi ahal izan zen. Pop-up bar delako ekitaldia maiatzaren bukaera aldera egin zen eta Chicagoko Craig Perman ardo adituak (Perman Wine Selections) eta Abe Conlon eta Adrienne Lo (X-Marx) sukaldariek antolatu zuten.

Dastaketan sagardo, txakolin eta pintxo aukera zabala izan zuten X-Marx jatetxera bildu ziren lagunek. Ekitaldiaren arrakastak argi erakusten du txakolinak AEBetan sortzen duen jakinmina gero eta handiagoa dela. Dastaketan txakolin zuria eta gorria edateko aukera izan zuten chicagotarrek. Huge Galdones argazkilariak ekitaldiaren irudi-erreportajea argitaratu du Chicagoist blogean.

[Craig Perman eta Abe Conlon sukaldaria, Txakoholika 2011 dastaketaren antolatzaileak (argazkia HGaldones)]

[Etxean eginiko odolki, piper gorri eta gazta pintxoa (argazkia HGaldones)]

[Chicagoko X-Marx jatetxeko sukaldari taldeak prestatu zituen Txakoholika 2011-ko pintxoak (argazkia HGaldones)]