euskalkultura.eus

Caracas, Venezuela. Iragan otsailaren 3an Caracaseko Eusko Etxeak hileroko meza egin zuen. Aita Miguel Odriozolak eman zuen meza eta elizkizunean berriki zendu diren Jon Ugutz Lejarcegui Maguregui eta Anton Goicoechea gogoratu zituzten. Era berean, Joseba Barreda bazkidea zoriondu zuten, egun horretan bertan 60 urte betetzen baitzituen.

Elizkizunean San Blas eguneko kordoiak eta Kandelario eguneko kandelak bedeinkatu egin ziren eta meza ostean bertaratu zirenen artean banatu zituen apaizak. Ohiturak dionez, kordoi eta kandela hauek gaisotasunak uxatu egiten dituzte.

Elkarteko hainbat bazkidek eskuz egin zituzten mezan banatu ziren kordoiak; zehazki Adriana Lobascio eta Pedro Arriaga senar-emazteak, eta euren senitartekoek. Kandelak, aldiz, Maite Carranzak eman zituen.

Mezaren ostean, igandero bezala, pilota partidak jokatu ziren elkarteko frontoian. Esku pilotan Ibane Azpiritxagak Julen Azpiritxaga anaiari irabazi zion 22 eta 6. Ondotik, binakako larruzko pilota partidan,  Diego Lana eta Gabriel Reyes bikoak Jorge Borraja eta Jaime Vera menderatu zituen 35 eta 34.