euskalkultura.eus

Buenos Aires, Argentina. Urrun geratu dira jadanik Gabonak eta urte amaierako jaiak. Hura eta gero hasi zen udako parentesia eta, orain, akzen hau amaitzen ari dela pixkanaka doaz bueltatzen Hego Amerikako euskal erakundeak euren egunerokotasunera. Hauxe da, besteak beste, Euskaltzaleak-en kasua, joan den asteazkenean izan zutelarik etxeko batzordekideek lehenengo bilera, urteko planak adosteko.

Euskaltegi buenosairestarretik azaldu digutenez, ikasturte berriko lehenengo hitzordua martxoaren 8an –Emakumearen Nazioarteko Egunean– finkatu dute eta komunitate osoari luzatu diote parte hartzeko gonbitea. Izan ere, proposamena, Buenos Airesko 2. Triki-Poteoa egitea ìzango da, iaz bezala etxeko trikitilari eta panderojoleak lagun. Aktibitatea, arratsaldeko 7ak aldera hasiko da euskaltegiaren egoitzan, Bernardo de Irigoyen kaleko 826an. Hortik, San Telmora joango dira poteatzaileak ibilbideko tabernetan geldialdiak eginez. Ibilbidea bukatutakoan, Euskaltzaleak-en egoitzan elkartuko dira berriro ere, pintxo, talo eta edari batzuk elkarrekin partekatzeko.

Triki-Poteoa izango da aurtengo lehenengo ekitaldia, eta ekitaldi programa osoaren abiatzea markatuko du. Mariana Arlak adierazi digunez, “oso urte berezia da hau guretzat, 70 urte beteko baititugu. Hori dela eta, ekintza guztiak urteurreneko ospakizun programaren baitan burutuko ditugu, eta ez dira gutxi izango: martxoaren 15ean Buenos Airesko Udalak antolatzen duen Sukaldaritza Gunean izango gara. Maiatzaren 11an, ‘Buenos Airesek ospatzen du’ jaialdian. Beti bezala, klaseak eman eta euskal jai tradizionalak ere ospatuko ditugu, hala nola Aberri Eguna, Sanferminak, San Inazio… eta aldi berean, on line ikastarokoa, topaketak, hitzaldiak, tailerra eta nola ez, Zine Zikloa, gauzatzen jarraituko dugu”.

ENE Saria

Eta “oso berezia” izango den urte hau, era berezi batean hasi du 70. urteurrena beteko duen euskaltegiak. Izan ere, urtarrilaren 27an eta HABEko teknikari den Kinku Zinkunegiren eskutik, ENE sariaren adierazgarri den estatuatxoa jaso zuten Euskaltzaleak-ek bere egoitzan.

[Eusko Ikaskuntza-ren izenean, Kinku Zinkunegik eskuratu zion ENE Saria Euskaltzaleak-eko lehendakaria Carlos Bordagaray-ri (argazkia EuskalKultura.com)]

Estatuatxoa jasotzeko zeremonian, gai horretan aditua den Zinkunegiren bisita baliatuz, Euskararen egoerari buruzko hitzaldi bat eskaini zuenn HABEko 'Euskara Munduan'eko koordinatzaileak. Txostena aurkeztu ondoren, pintxo selekzio eder bat, etxekoek eginikoa, partekatu zuten gonbidatuek eta Euskaltzaleak-eko kideek.

[Poz handiz jaso zuten Euskaltzaleak-eko kideek ENE Saria (argazkia EuskalKultura.com)]

Gogora dezagun Euskararen Nazioarteko Egunarekin batera urtero banatzen den ENE sariaren irabazlearen izena, abenduaren 3an adierazi ohi duela Eusko Ikaskuntzak eta 2013ko edizioan Euskaltzaleak-i eman zitzaiola. Abenduan jakinarazitako saria, urtarrilaren 27an entregatu zitzaion Buenos Airesen, eskuz-esku, euskararen alde egindako lan onagatik.