euskalkultura.eus

Buenos Aires, Argentina. 'Diasporako euskaldun garenez gero, gauza asko dauzkagu esateko eta ekartzeko Euskal Herriaren eraikuntza nazionalari dagokionez; horregatik, Nazio Eztabaida Guneak deiturik gaurkoan Iruñera milaka euskaldun bilduko diren bezala, Diasporako osatzen dugunok Buenos Airesen egin ahal izango dugu', adierazi dute argentinar hiribururako deia zabaldu duten erakundeek.

Hiriburu argentinarreko gogoeta eta aldarrikapen eta jardunaldia arratsaldeko lau t'erdietan hasiko da, Euskaltzaleak eta Euskara-taldeen eskutik aurkeztutako 'Euskara eta nortasun nazionala' izenpeko eztabaidarekin. Jarraian, bostetan, bildutakoek euskal nortasun nazionalaren inguruko Eztabaida Gunean parte hartu ahal izango dute,  "gai horrek dituen hiru oinarri garrantzitsuenak jorratzeko: lurraldetasuna, euskara eta erabakitzeko eskubidea (autodeterminazioa)", deialdian agertutakoaren arabera.

'Euskaltzaleak' abesbatzak euskal kantu emanaldia eskainiko du sei t'erdietan, eta bildutakoek taldearen errepika edo entsaio ireki batera sartu ahal izango dute. Euskal dantzek ere berezko lekua hartuko dute, Aitor Alava dantza irakasleak utzitako materiala medio. Programaren azkeneko txanpan, 'sormenerako gunea' antolatu dute Eusketxeko Euskal Kultura tailerren baitan, azkenik, zortzi t'erdietan, elkarretaratze afari batez biribiltzeko eguna.

Lotura interesgarriak

Nazio Guneko webgunea
www.naziogunea.net

Amerikako Euskal Diasporako Eztabaida Gunea
www.forodebatediasporavasca.blogspot.com/