euskalkultura.eus

Buenos Aires, Argentina. 113. urtebetetze eguna berez azaroaren 3ari bazegokion ere --1895eko egun horretan sortu baitzen Buenos Aireseko Nafar Etxea-- ospakizuna azaroaren 9ra atzerratzea erabaki zuen Zuzendaritza Batzordeak. Ekitaldiak, beraz, azaroaren 9ra, igandez egin ziren, Santa Amelia Parrokian meza batekin hasirik hain zuzen

Bertan, etxeko dantzari gazteek Elkartearen oihal gorria eraman zuten eta berau atxikita goardian egon ziren plantaturik zeremonian zehar.  Mezaren ondotik, bertaratutakoak Nafar Etxearen egoitzara, Moreno kalera, abiatu ziren, eguneko gainerako ekitaldiak bertan burutzeko.

[Buenos Aireseko Nafar Etxearen 113. urtemuga ekitaldietan parte hartu zuten banderadunak, Espainiako, Argentinako eta Nafarroako banderekin]

[Ospakizunetan parte hartu zuen bertako dantza taldeko kide helduak euren emanaldia eskaintzen pilota kantxan]

Etxeko trinketean, ehun bat lagunen aurrean, Crisanto Ayanz elkarteko lehendakariak ongi etorria eman zien gonbidatuei eta hitzaldi labur batean gainbegirada laburra egin zion Argentinako hiriburuko nafar erakundearen historiari. Hitzaldiaren ondotik, etxeko dantza taldeek, haurrenak eta helduenak, dantza ikuskizuna aurkeztu zuten.

Eguerdiondoko ordu batean, etxeko lehenengo pisuko aretoan dena prest zegoen anaitasun bazkari ederrari ekiteko. Bazkaldu bitartean, zozketak gauzatu ziren eta 'Nafar Etxearen Urtemuga Kopa' Mus Txapelketako sari banaketak egin zituzten.

[Ekitaldietan dantzari aritu ziren etxeko dantza taldeko kideek ongi irabazia zuten bazkarian parte hartzea. Bazkalostean eginiko argazkia da hau]

Bestela ere, eta urtearen amaierari begira, etxeko gazteek berbena bat antolatzen dihardute. Ekitaldia azaroaren 29an izango da, Buenos Aires probintziako Olivoseko “Centro Asturiano”n. Jai horretarako, janari eta dantza tipikoak prestatuko dituzte.

Lotura interesgarriak

Buenos Aireseko Nafar Etxearen webgunea
www.centronavarro.org