euskalkultura.eus

Iragan larunbatean, ekainaren 20an, Bruselako Euskal Etxeak euskal kantu gaualdi ederra egin zuen bere egoitzan. Ekitaldia oso berezia izan zen elkarteko kideentzat, bertan euskal etxearen Txalaparta koruak lehen emanaldi publikoa egin zuelako. Alboan, eskarmentu handiko lagunak izan zituzten: Ugaoko Sarea Abesbatza; eta biek ala biek txalo zaparrada jaso zuten.

Brusela, Belgika. Egun handia izan zuen iragan larunbatean Bruselako Euskal Etxeak, bere egoitzan egin zen euskal kantu gaualdi arrakastatsua dela eta. Bi koruk parte hartu zuten bertan. Batetik, Euskal Herritik etorritako Ugaoko Sarea Abesbatza, ibilbide eta eskarmentu handiko korua. Bestetik, Txalaparta, euskal etxeko korua, berriki sortua eta ilusioz eta gogoz gainezka.

Biek ala biek emanaldi ederra eskaini zuten eta entzuleek txalo eta txalo eskertu zieten egindako lana. Gauak giro ederra izan zuen eta emanaldiaren ostean pintxo dastaketa egin zen Bruselako Euskal Etxearen egoitza berrian (Rue Ferdinand Bernier 10, Saint Gilles). Menuan honakoak: humus, guakamole, tapenade, ogitartean jatekoak, tortila, quiche, azeitunak, gazta eta txorizoa.