euskalkultura.eus

Buenos Aires, Argentina. Datozen lerroetara bildu dugun informazioa, Buenos Airesko Iparraldeko Euskal Etxeko idazkari den Norma Rios euskal argentinarrak gurekin eskuzabal partekatu nahi izan du eta bere lankidetza atseginari zor diogu, testua zein argazkiei dagokienean. Berari eskerrak eta baita ere Carhué-ko Pedro Mari Agirreri, honek ere, La Pampatik, pistaren gainean ipini baikintuen, lasterketako euskal argazkiei lotutako argazkiak ere igorriz. Hona informazio hori, laburbildua, eta irudiduna.

[auto 323 zenbakiduna, Beñat Errandonea saratarrak eta bere gidarikide Jean-Pierre Garcin pilotatua]

[Errandonea eta Garcin-en autoa Buenos Airesa iristen, joan den igandean]

Aurten, urtarrilaren lehenean hasi zen Argentinan Dakar Argentina-Txile 2010 delakoa, txirrindak, quads, autoak eta kamioiak partaide, hasi ere. Kirol munduko ekitaldi garrantzitsu hau iragan larunbatean, urtarrilaren 16an, amaitu zen Bolivar-en. Ibilgailuak egun horretan bertan arratsaldez helduko ziren Buenos Airesera. Autoak Palermoko 'La Rural'eko aretoko instalazio itxian aparkatu eta igandean, hilaren 17an, sariak eman eta berehala pilotoak, bakoitza bere ibilgailuarekin, asmo horrekin propio itxitako hiriburuko kaleetan zehar kabalkada edo parada gisako ibilbide bat egin zuten.

[Errandonea eta Garcin agurka Buenos Airesera iritsitakoan]

[Beñat Errandonea, erdian, eta bere lagun Garcin, eskuinean, lasterketa amaitu eta berehala, zaletuen zorionak biltzen]

Norgehiagokan parte hartu zuten gidarien erdian Beñat Errandonea pilotoa (Sara, 23-08-1961) eta Jean-Pierre Garcin pilotokidea aipa daitezke, 323 zenbakiko autoa gidatzen, SMG marka edo eredukoa. 16. postuan gelditu zen. Abiatu ziren 134 autoetatik, 57 bakarrik iritsi ziren, %42a gutxi gora behera, azaltzen du Norma Riosek.

-Errandonea-Garcin ekipoari buruz
http://www.dakar.com/2009/DAK/RIDERS/es/equipage/321.html

-'Los calzoncillos de Beñat'
http://www2.deia.com/es/impresa/2009/01/15/bizkaia/kirolak/529264.php