euskalkultura.eus

Boise, EEUU. Idaho estatuko hiriburuak Basque Museum & Cultural Center elkartearen Wine Fest jaialdiaren hamaikagarren edizioa egingo du datorren abuztuaren 15ean. Jaialdi hau Idahon udan zehar egiten diren Ardo Jaialdi zaharrenetako eta jendetsuenetakoa da. Jendearen babesa ez dator jaialdian dastatu daitekeen ardo aukera zabalarengatik bakarrik, baizik eta ekitaldian jasotzen den dirua Euskal Museoaren jarduna finantzatzeko erabiltzen delako.

Hitzordua klasiko bat da paraje hauetan eta iaz 500 lagundik gora bildu ziren bertara. 'Basque Museum-arentzat urte osoan dirua biltzeko egiten den ekitaldi nagusia da', azaltzen dio jaialdiaren koordinatzaile Diana Echeverriak IdahoStatesman egunkariari. ‘Jaialdi honekin biltzen dugun diruak Euskal Museoaren hezkuntza programa eta komunitateko ekintzak sustatzeko erabiltzen da', gehitzen du Patty Miller-ek, museoko zuzendariak.

Ardo aukera zabala

Jaialdia Basque Block gunean (Grove Street) egingo da, arratsaldeko bost t'erdietatik aurrera. Idahoko edari banatzaile talde batek bere ardoen dastaketa egiteko aukera emango du. Tiketa duen heldu bakoitzak dastaketa egiteko edalontzi bat jasoko du. Gainera, Basque Blockeko jatetxe eta taberna euskaldunek euskal-amerikar estiloko janaria dastatzeko aukera ere emango dute. Lokalak honakoak dira:  Gernika Basque Pub & Eatery, Leku Ona Basque Restaurant, The Basque Market eta Bardenay Restaurant and Distillery.

Jaialdiaren beste proposamen nagusia Oinkari dantza taldearen erakustaldia izango da. Taldea duela ia 50 urte sortua da eta harrez gero Idahoko jai eta ekitaldi ugari girotu ditu, euskal dantzak zabalduz. Bestalde, egunean zehar 'enkante isila' ere egingo da, herriko enpresari eta ardo banatzaileek dohaintzan eman dituzten opariekin.

Tiketak aldez aurretik 27 dolarretan eros daitezke, museora deituz (208-343-2671). Egunean bertan tiketak 30 dolar balioko dute. Prezio honetan janari eta edariak eskatzeko sei tiket emango dira. Hortik aurrera tiket bakoitzagatik dolar bat baino ez da ordaindu beharko.