euskalkultura.eus

Bilbao, Bizkaia. Trebakuntza maila handia duten bizkaitarren kontratazioa eta promozioa sustatzea da bizkaia:xede elkartearen helburu nagusienetakoa, gero profesional hauek euren lanarekin bizkaitar gizartearen onerako izango den iraultza teknologiko eta zientifikoaren garapenean lagundu dezaten. Asmo horrekin deialdia egin die bizkaia:xedek atzerrian lanean ari diren eta Diasporako bizkaitar ikerlari eta profesionalei, Bizkaiko hainbat enpresetan dauden postuak betetzera etortzeko gonbitea eginez.

Elkarteak lehendabiziko aldiz abiarazi du horrelako kanpaina garrantzitsua eta dagoeneko hiru ikerlarik izan dute berari esker Euskal Herrira itzuli eta Bizkaian lan egiteko aukera. Ikerlari hauen lekukotzak bizkaia:xederen webgunean irakur daitezke, hemen. Horietako bat da Mikel Valle ikerlaria. Bere esanetan 'Euskadin iraultza txikia gertatzen ari da zientzien arloan'. 'Ez nuen hori galdu nahi', adierazten du.

Egitasmo honetan parte hartu nahi dutenek euren CV-a bidali behar dute bizkaia:xedera, hona. Horrezaz gain, webgunearen bidez ikerlariek Bizkaiko hainbat enpresetan dauden lan eskaintzen berri eskuratu ahal izango dute.