Biographical Dictionary of Idaho Basques liburuak estatu horretako ia 10.000 euskal amerikarren berri jasoko du

Duela hamar urte 'Euskaldunak Mexikon' liburuarekin egin zuen antzera, Koldo San Sebastian kazetari eta produktorea Idahoko ia 10.000 euskaldunen bizitzen berri emango duen liburua prestatzen ari da. Berarekin batera Argitxu Camus, Patty Miller eta John Bieterrek osaturiko taldea ari da lanean. Liburua abendu aldean argitaratzeko asmotan dira, euskaraz eta ingelesez. Ondoren Nevada, Oregon, Utah, Washington State eta Wyoming-eko hiztegiak etorriko omen dira.

Urte bukaera aldera Idahoko euskaldunek ia 10.000 euskal amerikarren berri jasotzen duen hiztegi biografikoa izango dute eskuragarri. Ekimenaren arduraduna Koldo San Sebastian kazetari eta idazlea da eta berarekin batera Estatu Batuetako ikerlari eta aditu talde bat ari da lanean: Argitxu Camus, Renoko Unibertsitatekoa; Patty Miller, Boiseko Euskal Museoaren zuzendaria eta John Bieter, historialaria eta Boise State Universityko irakaslea.

Euren lanari esker Idahon bizimodua egin zuten milaka euskaldunen biografiak bildu eta liburu gisa argitaratuko dituzte. Liburuaren arduradunek azaldu dutenez 1890 eta 1930 artean ia 10.000 euskaldun joan ziren Idahora, gehienak artzaintzan aritu zirelarik. Asko Euskal Herrira bueltatu ziren, baina kopuru handi bat hantxe gelditu eta Idahon sortu zuten familia, askotan beste euskaldun batekin ezkonduta. Orain euskaldun haien ondorengoek, edota Euskal Herrian gelditu ziren senitartekoek euren arbasoen biografia irakurri ahal izango dute. Koldo San Sebastianek, adibidez, Flora Bengoetxea amona, 'Idahon jaiotako lehen euskalduna' topatuko du liburuko orritan.

Santos Recalderen elkarrizketak

Liburuko ikerketa egiteko iturri ugari erabili ditu lantaldeak, horien artean Ellis irlako immigrazio artxiboak, Estatu Batuetako zentsu federalak, draft-ak (bi mundu gerretako erreklutamendu zerrendak) eta Boiseko Euskal Museoak Basque Oral History ekimenean bildu zituen lekukotasunak.

Hauetaz gain material berri bat ere aurkitu du ikerketa taldeak, Santos Recalde apaizak 1967 eta 1968 artean Loiolako Herri Irratirako eginiko elkarrizketak. Benito Ansolak, Lekeitioko apaizak, utzi zidan materiala. Bertan Nevadan, Idahon eta Wyomingen egin zituen elkarrizketak daude. Lekukotasun asko dira: Serapio Etxeberria Oregoneko lekeitiarra; Daniel Aranguena gernikarra; Hermenegilda Uberuaga, Ontarion...', azaltzen du San Sebastianek. [Ezkerreko irudian Koldo San Sebastian kazetari eta produktorea]

Liburuan Mikel Gorrotxategi euskaltzainak eginiko azterketa onomastiko eta topografikoa ere egongo da. Hiztegia euskaraz eta ingelesez argitaratuko dute, urte bukaera aldera. Ondoren beste batzuen txanda helduko omen: Nevada, Oregon, Utah, Washington State eta Wyoming.

Lotura interesgarriak

Basque Museum & Cultural Center, Boise, ID
www.basquemuseum.com

Boise Basque Center, Boise, ID
www.basquecenter.com

Oroitzapenak, Voices of the Basques of America
Oral History Project

euskalkultura.eus

Albisteak

Biographical Dictionary of Idaho Basques liburuak estatu horretako ia 10.000 euskal amerikarren berri jasoko du

Irakurrienak

Azken komentarioak