euskalkultura.eus

Arrecifes, Argentina. Euskara Munduan programaren baitango Argentinan Euskaraz 2004–2007ko proiektua amaiturik, eta izan zuen arrakasta ikusita, HABEk Diasporako beste herrialde batzuetara zabaldu du euskara irakasleak trebatzeko programa. Hego Ameriketako ikasle-irakasleek osatutako taldea joan den martxoan abiatu zen aurreko taldeek (Diaspora I eta IIk) erabilitako metodologia berdinarekin, esan nahi baita urrutitik ikasiz --irakaskuntza remotoa baliatuz-- eta urtero aurrez aurreko bi barne-ikastaro deituz. Aurrez-aurreko ikastaro horietako lehenaren txanda heldu da orain eta larunbat honetan, lehenbizikoz, nazioarteko ikasle-irakasle talde honek astebeteko ikastaroan hartuko du parte Arrecifesen. Aldi berean, Diaspora-II taldeko ikasleek euren ibilbideari eutsiko diote, Arrecifesen elkar topatuz, irakasleak Euskal Herritik etorriak zein Argentinakoak izango dituztela.

Klaseetako ordutegia goizeko 9:00etatik 11:00etara eta 11:30etatik ordu batera izango da. Arratsaldez, berriz, 6:00etatik 7:00etara eta 7:30etatik, 9:00etara. Ikasleak Hotel Arrecifesen geratuko dira eta otorduak “Rico y Natural” ostatuan egingo dituzte, adierazi diote EuskalKultura.com-i antolatzaileek.

Ikastaroaren ardura zuzena hartuko dutenak Kinku Zinkunegi HABEko teknikaria eta Iraia Saez de Viteri irakaslea izango dira, Euskal Herritik propio etorriak. Irakasle argentinarren laguntza ere izango dute eta bertan arituko dira Gabriela Mendia Buenos Aireskoa; Natalia Hormazabal San Nicolasekoa; eta Cecilia Cenoz Tandilgoa.

Datorren astean, FEVAren bilera

Bestalde, larunbat goizean FEVA batzartuko da. Bilera honetan Kinku Zinkunegik euskara txostena aurkeztuko du, eta edonola ere bildutakoek aztergai hatuko dituzten puntuen artean aipa daiteke 2011ko Euskal Astea Necochean antolatzeko eskaera, Euskaditik etorriko diren gonbidatuak, aurtengo Euskal Astea, eta FEVAko diru kontuak.

Aipatu, azkenik, abuztuaren hiruan Arrecifeseko 'Euskaldunak Denak Bat' Euskal Etxeak San Ignazio eguna ospatuko duela. Goizeko hamarretan San José de los Arrecifes parrokian meza izango da; eguerdian, euskal etxeko areto nagusian, bazkaria; eta arratsaldean, dantzariak eta Maral eta Tumbao musika taldeak aurkeztuko dira.

Barnetegiko partaideen zerrenda

Lotura interesgarriak

HABEren webgunea
www.habe.org

FEVAren webgunea
www.fevaonline.org.ar