euskalkultura.eus

Mountain Home, ID, Estatu Batuak. Mountain Home-ra egin zuen bisitan Eusko Jaurlaritzako Kanpoko Euskal Gizataldeekiko Harremanetarako zuzendaria bere departamenduko Benan Oregi eta Andoni Martin teknikariak lagun iritsi zen. Julian Celayak AEBtako Mendebaldeko zenbait euskal etxe eta komunitate bisitatu ditu joan den astean Kalifornia, Nevada eta Idahon, kargura duela hilabete eskas iritsi eta gero egin duen lehenengo bisita ofizialean.

Joe Lasuen, Mountain Home-ko EEko ordezkari; eta Richard Urquidi bertako Udaleko zinegotzia eta aldi berean euskal komunitateko kide aktibo, izan zituen gidari joan den asteko asteazkenean aipatu euskal ordezkaritzak Mountain Home-ko euskal presentziaren lekuko diren tokiak bisitatzerakoan, tartean 1910ean eraikitako Bengoechea Hotela eta, honen ondoan, Euskal Etxearen eraikina. Celaya mintzatu zen, besteak beste, Goizalde Jausoro euskara irakaslearekin eta John Bideganeta bertako euskal komunitateko kidearekin; herriko alkatea ere, Tom Rist, agurtzera etorri zitzaion. Bertako euskal berri hartu ondoren, harrera ekitaldia abegikorra eskaini zion Mountain Home-ko euskal gizataldeak. Bertakoak egin ondoren, Celaya buru zuen ordezkaritza Gooding aldera abiatu zen, beste herri honetako euskal etxearen eraikinera hain zuzen, eta ondoren Boisera, batean zein bestean hango eta hemengo euskal kolektibitateekin biltzera.

Celayaren bisita joan den astean izan zen, baina aste honetan Mountain Homeko urteroko Euskal Jaia bere 49. ediziora iritsiko da bihar, larunbata, honako egitarauarekin:

-5:30etan: Haurrentzako jokoak
-6:30etan: Helduen erakustaldiak
-7:30etan: Bertako 'Etxeko Gazteak' dantzariak
-8:00etan: Boiseko Oinkari dantzariak
-9:ooetan: Berbena/bala/dantzaldia, Boiseko 'Amuma says no' taldearekin