euskalkultura.eus

La Habana, Kuba. Aurreko artikuluan azaltzen genuenez, Kubako Asociación Vasco-Navarra de Beneficencia elkarteak joan den apirilaren 11 eta 12an ospatu zuen aurtengo Aberri Eguna, asteburuan zehar 200 lagundik gora bilduz Habanako 'Centro Vasco'-n egin ziren ekitaldietara. Jarduerak Aberri Egunaren bezperan hasi ziren, larunbatean, I. Euskal-Kubatar Mus Txapelketarekin. Txapeldunak Josemi Arrugaeta eta Daniel Vélez argazkilaria izan ziren. Vélez Kuban zen Iparralderi buruzko argazkien erakusketa bat aurkezten.

Igandean, Aberri Egunean bertan, Kuban bizi diren euskaldunak, euskal kubatarrak eta euskal kulturaren lagunak Centro Vasco-n bildu ziren, bertan euskal-kubatar anaitze alai eta koloretsuaz gozatzeko. Eguna Edorta Jimenez idazleak eskaini zuen hitzaldiarekin hasi zen, eta ondoren bertso saioa izan zen, Euskal Herriko Unai Muñoa eta Ander Lizarralde bertsolariekin eta Kubako Luis Paz eta Emiliano Sardiñas repentistekin.

[Unai Muñoa eta Ander Lizarralde bertsolariak Luis Paz eta Emiliano Sardiñas repentista kubatarrekin saioa eskaintzen Habanako 2009ko Aberri Egunean (argazkia www.paysbasqueinfo.com)]

[Bertso saio koloretsuaren ostean Kubako eta Euskal Herriko bertsolariak besarkada batean bildu ziren (argazkia paysbasqueinfo.com)]

Saioaren ostean bertara bildu zirenek euskal bazkari goxoa dastatu zuten Centro Vasco-ko jatetxean eta bazkalostean lokaleko diskotekan erromeria egin zen Azpeitiko Kupela taldearekin, Kubako Ray Fernández kantariarekin eta bertsolariekin. Euskal musika bideoak ere eman zituzten pantaila erraldoian.

[Kupela talde azpeitiarraren kontzertua Habanako 2009ko Aberri Egunean (argazkia Jose Goitia)]

[Jose Goitiak, Kuban bizi den euskaldunak, eta bere alaba Amaiak ere jaian parte hartu zuten (argazkia paysbasqueinfo.com)]

[Ray Fernandez eta Vivian Goitia kubatar musikariek Habanako Aberri Eguneko erromeria alaitu zuten euren kantekin (argazkia www.paysbasqueinfo.com)]