euskalkultura.eus

Cañuelas, Argentina. Urtero gauzatzen da Cañuelas herrian Dantzari Topaketa Aberri Egunaren ospakizunen testuinguruan eta helburu batzuk betetzen dira proposamen honekin. Euskaldunentzat hain garrantzitsua den data aldarrikatzeaz gain, euskal etxeetako gazteak elkartu eta herriko jendeak euskal kultura ezagutzea dira xede nagusiak.

Aurten topaketaren V. edizioa gauzatu zen eta espero bezain arrakastatsua suertatu zen. Eguraldi lagun, berrehun bat dantzari, hamazazpi euskal etxetako ordezkari eta ehunka lagun bildu ziren San Martin Plazan Cañuelaseko euskaldunekin Aberri Eguna ospatzeko.

[Erraldoi, danbor eta dantzariek osatutako kalejira batek bideratu zuen jendea plazan prestatutako agertokira (argazkia EuskalKultura.com)]

[Euskal Etxeko Abesbatzak eman zion hasiera jaiari Euskal Herriko Ereserkia abestuz (argazkia EuskalKultura.com)]

[Iaz bezala aurten ere Aurresku dantzatzeko ohorea Cordobako Villa Mariako Euzko Etxea-ko dantzari batena izan da (argazkia EuskalKultura.com)]

[Cañuelaseko Denak Bat eta Las Heraseko Zazpirak Bat euskal etxeetako kideek osatutako danborrada oholtzaren gainean (argazkia EuskalKultura.com)]

[Dantzak hasi baino lehen eta jasotako laguntza eskertzeko, Cañuelaseko Denak Bat Euskal Etxeko lehendakaria den Daniel Sancholuz-ek opari bat -- txapela bat -- eskuratu dio Gustavo Arrieta herriko alkateari (argazkia EuskalKultura.com)]

[Cañuelas eta Gral. Las Heraseko txikienak izan ziren tauletara atera ziren lehengo taldeak. Elkarrekin Ipurdi Dantza, Zazpi jauzi eta Fandango egin zituzten (argazkia EuskalKultura.com)]

[Maipuko Anaitasuna Euskal Etxeko neskak Lore Arku dantzatzen (argazkia EuskalKultura.com)]

[Paranako Urrundik-eko taldeak Gipuzkoa egin zuen (argazkia EuskalKultura.com)]

[Gral. Rodriguezko taldea ere izan zen V. Dantzari Topaketan. Aurten Koadrila egin zuten Rodriguezko gazteek (argazkia EuskalKultura.com)]

[Zazpiehun bat kilometro egin behar izan zituzten dantzari cordobatarrek Cañuelasek egindako gonbiteari baietz esateko. Hala ere eta bidaia luzea izan arren, San Martin Plazan Nafarroak Plazan Dantzan aurkeztu zuten Eusko Txokoa-ko gazteek (argazkia EuskalKultura.com)]

[Mar del Platako Denak Bat Euskal Etxeko Beti Alai Dantza Taldea Azkoitia dantzatzen (argazkia EuskalKultura.com)]

[Lomas de Zamorako dantzariek Arkuak lurrean prestatu zuten aukera honetarako (argazkia EuskalKultura.com)]

[Buenos Airesetik bidaiatu ziren Ekin Dantzari Taldeko kideek Arin Bodarin interpretatu zuten (argazkia EuskalKultura.com)]

[Bosgarren urtez jarraian La Platako Euzko Etxea presente egon da Cañuelaseko Aberri Egunaren ospakizunean. Buenos Aires probintziako hiriburuko gazteek Plazara dantzatu zuten aurten (argazkia EuskalKultura.com)]

[Etxekoek euren trebetasuna erakutsi  zioten bildutako jendeari. Cañuelaseko dantzariek Batelera egin zuten (argazkia EuskalKultura.com)]

[Chivilcoy-ko euskaldunak ere igo ziren Cañuelaseko plaza nagusian kokatuta zegoen agertokira. Haiek Arku Dantza egin zuten (argazkia EuskalKultura.com)]

[Santa Fe probintziatik ere kilometro mordo bat egin behar izan zituzten Rosarioko Zazpirak Bat Euskal Etxeko dantzariek. Irudi honetan Gorularia dantzatzen ari dira (argazkia EuskalKultura.com)]

[Buenos Aireseko Accion Vasca Taldeko neskek Txakolin aurkeztu zuten (argazkia EuskalKultura.com)]

[“Agur” esaten hasteko, Maipuko dantzariek berriro hartu zuten agertokia Viva Navarra egiteko (argazkia EuskalKultura.com)]

[Ikuskizunarekin bukatzeko, euskal etxe anfitrioiaren dantzariek, Gral. Las Herasekoekin batera Fandango, Arin Arin eta Kalejira  egin zituzten (argazkia EuskalKultura.com)]

[Dantzaldia bukatuta, dantzariek dantzan jarraitu zuten baina oraingoan euskal etxeko egoitzan. Erromerian eta Cañuelaseko bertako musikariek lagunduta, gazteek Argentinako folklorea dantzatu zuten (argazkia EuskalKultura.com)]

[“Agur eta datorren urte arte” esateko momentua heldu zen igande eguerdian. Nekazaritza Elkartean bazkaldu zuten Cañuelaseko V. Dantzari Topaketan parte hartu zuten lagun guztiek. Antolatzaileak oso pozik agertu ziren eta esker beroak eman zizkieten Cañuelasera bertaratu ziren euskal etxeetako ordezkari guztiei. Esker giza ere oroigarriak eskuratu zizkieten Denak Bat-eko batzordekideek dantza talde guztiei. (argazkia EuskalKultura.com)]