euskalkultura.eus

Nueva York, EEUU. New Yorkeko Nazioarteko Literatur Jaialdiak aurten 'Eboluzioa/ Erreboluzioa' gaia izango du hizpide, apirilaren 27tik maiatzaren 3a bitartean. AEBetako idazle eta literatur zaleen PEN Club-ak sustatzen duen jaialdiak bostgarren edizioa betetzen du aurten eta oraingoan ere mundu osoko gaur egungo idazle sorta interesgarria ekarriko du Sagar Handira. Parte hartuko duten 41 herrialdetako 160 idazleen artean Bernardo Atxaga izango da, 2006ean egin zuen bisita errepikatuz. Jaialdiak aipatutako gaiak aztertuko ditu idazleen kultura desberdinen ikuspuntu anitzetatik eta moldeak ere anitzak eta berritzaileak izango dira: mahainguruak, irakurraldiak, zine emanaldiak, itzulpen 'slam' bat eta Kabaret Gau bat Lou Reed kantaria eta James Franco eta Parker Posey aktoreekin, besteak beste.

Asteasuko egilearen lehen ekitaldia ostegunean, apirilaren 30ean izango da, 'Gaztelerazko literaturaren joerak' gaiari buruzko mahainguruan. Ekitaldian Atxagarekin batera Javier Calvo espainiarra, Enrique Vila-Matas kataluniarra eta Santiago Roncagliolo peruarra izango dira. Barbara Epler estatubatuarra izango dute moderatzaile. Ekitaldia 16:00tan egingo da New Yorkeko Cervantes Institutuan (211–215 East 49th Street). Sarrera doan.

Munduko ahotsak

Atxagaren bigarren hitzordua maiatzaren 1ean izango da, Unterberg Poetry Center aretoan (1395 Lexington Avenue). Munduko herrialde desberdinetako idazleen irakurraldi bat izango da, 'Readings from Around the Globe' izenburupean. Atxagarekin batera parte hartu dutenak Petina Gappah (Zimbawe), Mariken Jongman (Herbeherak), Michael Ondaatje (Sri Lanka/Kanada), Daniel Sada (Mexiko), Hwang Sok-yong (Korea), Antonio Tabucchi (Italia) eta Colm Tóibín (Irlanda) izango dira. Ekitaldia 19:30tan hasiko da eta sarreren prezioa 20 dolar izango da (15 dolar PEN Club-eko kideentzat).

Jaialdiari buruzko informazio gehiago bere webgunean: www.pen.org