euskalkultura.eus

Bartzelona, Catalunya. Bartzelonako Euskal Etxeak aurten ere bere ekarpen berezia egingo die La Mercé jaiei, astebururako prestatu duen egitarau oparoarekin. Euskaldunen parte hartze hau Bartzelonako jaietako klasiko bihurtu da jada eta bertako udaletxearen babesa ere jaso du azken urtetan. Euskal Etxeak antolatutako ekitaldiak Camp de l'Arpa (Av. Meridiana, Aragó eta Consell de Cent artean).

Egitaraua ostiral honetan hasiko da, irailaren 19an, asteburuan zehar irekita egongo den artisautza eta euskal gastronomia merkatuaren inaugurazioarekin. Arratsaldeko zazpi t'erdietan Trapu Zaharra antzerki konpainiak 'El pisito' lana eskainiko du. Egunari bukaera borobila emateko, kontzertuak izango dira hurrena: Cherry Boppers, jazz, funk eta groove-a lantzen duten bilbotarrak; Los Fulanos, Bartzelonako soul-a, eta DJ Mota, Bartzelonatik ere, old school funk-a lantzen duena.

Larunbatean eguna haurrentzako antzerkiarekin hasiko da, 'Mitja Taronja' izeneko ikuskizunarekin. Lan honek txotxongiloak, dantza, literatura eta marrazkiak nahasten ditu, jolasteko ilusioa berreskuratzea proposatuz. Eguerdian pintxo dastaketa egingo da Euskal Etxearen txoznan eta ondoren herri kirol erakustaldia. Arratsaldean haurrentzako tailerrak, txalaparta ikastaroak eta Irurtzungo joaldunekin kalejira egingo dute. Gauean Pakearen aldeko Kontzertuaren edizio berri bat egingo da, Kerobia, Root Diamonds, Trikizio eta Dr. Calypso taldeekin.

Igandea, jaien azkeneko egunean, kalejira, merkatu eta herri kirolekin hasiko da. Ondoren Orritz-Iskidi dantza taldearen emanaldia. Eguerdian herri bazkaria egingo da, Karlos Ibarrondo sukaldariak prestatuta, eta ondoren batukada eta tabalers-en emanaldia eskainiko dute. Arratsalde gau partean kontzertuak izango dira berriz, Dijous Paella taldearekin eta Oreka TX-eko txalapartariekin.

Jaiari buruzko informazio osoa, Bartzelonako Euskal Etxearen webgunean, hemen.