euskalkultura.eus

Bartzelona, Katalunia. 'Oteiza 101' zikloaren lehenengo astebeteko egitarauak honako emanaldiak eskainiko ditu: Bihar larunbata, urtarrilak 24, “Hala mintzatu zen Zappatustra” Ander Lipus & Karabanaren antzerki saioa, arratsaldeko zortzietan Euskal Etxean. Urtarrilaren 28an, asteazkena, Konspirazio laborategiaren lehen jardunaldi eta lan eguna, arratsaldeko zazpi t'erdietatik aurrera Euskal Etxean. Azkenik, ostiralean, rrtarrilaren 30ean, “Fragmentos”en (1992) proiekzioa, Jon Intxaustegik zuzenduriko eta Oteizarekin batera eginiko dokumentalaren emanaldia, arratsaldeko zazpi t'erdietan Euskal Etxean. Informazio gehiago, ekimenaren blogean.

Zikloaren zergatiei eta xehetasunei buruz, antolatzaileen azaltzen dutenez, Oteiza 1908an jaio zen eta 2008an, Euskal Herrian, bere jaiotzaren mendeurrena ospatu zen. "Bartzelonako Euskal Etxeak, aldiz, 2009a baliatuko du Oteiza eta bere arteak merezi duen atzera begirada hori egiteko. Hor jaiotzen da Oteiza 101 proiektua. Urte osoko proiektu bat da, non Oteizaren artea, pentsamendua, proposamenak, etab. aztertu, erakutsi eta zabaltzen dituzten hainbat proposamen izango ditugun Euskal Etxean 2009 osoan zehar aste ezberdinetan antolaturik, urtaro bakoitzeko bat".

'Konspirazio laborategia'

Antolatzaileen esanetan, ez da euren asmoa "aste hauetan 'Oteizari buruz' hitz egingo diguten hitzaldi sorta bat antolatzea. Ez diegu hitzaldiei ateak ixten, ezta gutxiago ere, baina, beste ikuspuntu bat eskaintzeaz aparte, praktikotasun batera eraman nahi dugu, bere mezua bere osotasunean zabaltzea. Honela, esaera honek laburbilduko luke gure asmoa: 'Entzutea ahaztea da, irakurtzea gogoratzea eta egitea ikastea'".

Oteiza 101 proiektuarekin batera jaiotzen da Konspirazio laborategia izena hartu duen proiektua. Bartzelonako Euskal Etxeak bertan parte hartzera deitzen ditu artea espresatzeko modu gisa erabiltzen duen edozein, esperimentatzea eta artearen bidez espresatzea baitu helburu. "Oteiza 101 proiektuan urtean zehar egingo diren bizkarrezurretako bat izango da, aste ezberdin hauetan, Oteizaren pentsamenduaren alderdi ezberdinekin esperimentatuz, laborategiko partaideek euren lanak Euskal Etxean erakusgai izango dituztelarik. Artearen ahalik eta diziplina gehienekin lan egitea du helburu Konspirazio laborategiak: argazkigintza, eskultura, ilustrazioa, bideoa, dantza, antzerkia…."

Lotura interesgarriak

Ekimenaren bloga
http://oteiza101.blogspot.com

Bartzelonako Euskal Etxeko bloga
http://blog.euskaletxeak.org