euskalkultura.eus

Buenos Aires, Argentina. Inauteri gauak oraindik bizirik, gonbite berri bat luzatu dio Buenos Aireseko Udalak bere hiritargo osoari. 'Sukaldaritza Gunea'n jatorri askotako platerak dastatu ahal izango dituzte bisitariek, kolektibitateetako kideek eta jatorrizko errezetak jarraituz egindakoak.

Euskal Herriko komunitate eta sukaldaritzari dagokionez, bi ordezkari izango ditu: Laurak Bat eta Euskaltzaleak erakundeak. Iaz bezala, stand bana izango dute euskal etxeek, bakoitzak bere menua eskaini ahal izateko: Euskaltzaleak-en kasuan, mota askotako pintxoak, eta Laurak Bat-enean, frijituak. Jaialdiaren protagonista janaria izango bada ere, zuzeneko musika, dantzak eta jai giroa ez dira faltako euskal txosnetan.

Buenos Aireseko 'Kolektibitateen Sukaldaritza Gunea' martxoaren 15ean izango da 2014 honetan eta euskal gizataldearentzat, nolabait, berotzeko ariketa bihurtuko dela esan daiteke. Ez dezagun ahaztu bi hilabete barru --maiatzaren 11an hain zuzen-- 'Buenos Aires celebra al País Vasco' (Buenos Airesek Euskal Herria ospatzen du) delako ekimenaren protagonista izango direla Argentinako euskal etxeak, milaka lagun biltzen dituen jaialdian. 

Sukaldaritza Guneak arratsaldeko 4etan irekiko dizkio ateak publikoari eta standak gaueko 11ak arte egongo dira irekita. Elkargunea argentinar hiriburuko Mayo Etorbidea izango da, Bolivar kale juntan. Antolatzaileek jakinarazi digute euria eginez gero, hilaren16an, igandea, burutuko dela.